Atyraýdyń balyǵy elordalyqtardyń zor suranysyna ıe
ASTANA. QazAqparat - Elordanyń bas alańynda Atyraý men Batys Qazaqstan oblystarynyń aýyl sharýashylyǵy ónimderi jármeńkesi ótýde.
Jármeńkeni Astana qalasynyń ákimi Imanǵalı Tasmaǵambetov pen Batys Qazaqstan oblysynyń ákimi Nurlan Noǵaev aralap shyqty.
«Búgin mine ózderińiz kórip otyrǵandaı, Astanaǵa elimizdiń eki úlken batys ólkesi Atyraý men Batys Qazaqstan oblystary at basyn buryp otyr. Osyǵan deıin jármeńkesin ótkizgen aımaqtar sııaqty olar da óz óńirlerinde ónidiriletin ónimderin ákelip, halyqqa usynýda. Batys Qazaqstan oblysy etten bastap, kókóniske deıin 500 tonnadan astam azyq-túlik ákeldi. Jalpy, ákelingen ónimder qaladaǵy bazarlardyń baǵasymen salystyrar bolsaq 15-20 paıyzǵa arzan saýdalanýda», - dedi elorda ákimi.
Sonymen qatar I.Tasmaǵambetov Atyraý oblysy munaıly ólke bolǵandyqtan aýyl sharýashylyǵy basqa óńirlermen salystyrǵanda jaqsy damymaǵandyǵyn qaperge saldy. Sondaı-aq onyń basty sebebi aımaqtyń aýa raıy jaısyzdyǵyna, jer qunarynyń aýyl sharýashylyǵyn damytýǵa kelmeıtindiginde ekendigin atap ótti.
«Sondyqtan da Atyraýdyń eń basty ákelgen taýary - balyq ónimi. Byltyrǵy jármeńkede balyq ónimderine suranys joǵary bolǵandyqtan osy joly dál osy ónimge basa nazar aýdaryp, molynan ákeldi», - dedi qala basshysy.
Shynymen de, bul joly Atyraý oblysy jármeńkege sazan, taban, kókserke syndy 60 tonna balyq ákelgen eken. Dál osy ónimderge elordalyqtardyń tarabynan suranystyń joǵary ekendigi anyq baıqalady. Balyq satyp alý kezegindegi qalalyqtardyń sany az emes.
