Atyraýdyń aýasynda kúkirtti sýtek mólsheri 200 esege artty degen aqparat dáıeksiz - Qazgıdromet
ASTANA. QazAqparat - Atyraýda kúkirtti sýtektiń shekti mólsheri 200 esege artty degen aqparat dáıeksiz. Bul týraly «Qazgıdromet» RMK málim etti.
QR Energetıka mınıstri Qanat Bozymbaevtyń tapsyrmasy boıynsha, Atyraý oblystyq ekologııa departamenti men «Qazgıdromet» RMK bólimshesi kúkirtti sýtekpen lastaný kózin anyqtaýda obektıvti baǵalaýdy qalyptastyrý úshin kún saıyn aýany tekserip otyrady.
Baqylaýdyń nátıjesine sáıkes QR Energetıka mınıstri Q.Bozymbaev pen Atyraý oblysynyń ákimi N.Noǵaev kezdesedi, onda Atyraý obylysy men qalasyndaǵy ekologııalyq jaǵdaıdy jaqsartýǵa qatysty sharalar aıqyndalady.
2018 jyldyń 9-nan 10 sáýirge qaraǵan túni Atyraý oblystyq ekologııa departamenti, «Qazgıdromet» RMK bólimshesi jurtshylyq ókilderimen birlesip, Atyraý qalasynyń syrtyndaǵy toǵandar qoımasy aýmaǵynda («Kvadrat», soltústik-batys) aýany lastaýshy zattar kontsentratsııasyn jeke-jeke tekserdi.
Birneshe shaǵyn gaz analızdaýshy kómegimen aýany tekserý kezinde sý kózderi mańynda kúkirtti sýtek mólsheri barlyq qurylǵyda bir deńgeıde anyqtaldy.
Ekologııa departamentiniń qurylǵysy 1,5 mg/m³, Qazgıdromet qurylǵysy 2,01 mg/m³, A. Haırýllın qurylǵysy 2,37 mg/m³ kúkirtti sýtekti anyqtady.
«Qazgıdromet» RMK bólimshesiniń dırektory S.Tólenovanyń aıtýynsha, kúkirtti sýtekti ólsheý tikeleı lastaný kózderinde jasalǵan.
«Erejege sáıkes, ólsheý sanıtarlyq-qorǵaý jáne qonystaný aımaǵy shekarasynde júrgizilý qajet. Atyraý qalasynda mundaı jaǵdaı tirkelmedi. Atyraýda kúkirtti sýtek boıynsha Shekti ruqsat etilgen kontsentratsııanyń (RShK) 200 esege artýy tirkeldi degen aqparat dáıeksiz», - dedi ol.
