Atyraýdy taǵy da shańdy daýyl basty
Atyraý oblysynda shańdy daýyl jıi kóteriledi. Búgin, 21 sáýirde tańerteńnen beri jel ekpini kúsheıip, shańdy daýyl soǵyp tur.
Keshe, 20 sáýirde óńir turǵyndaryna 112 qyzmetinen shańdy daýyl bolatyny týraly sms habary kelgen edi.
«Qazgıdromet» RMK-nyń málimetinshe, Atyraý oblysynyń batysynda, shyǵysynda, ońtústiginde shańdy daýyl kútilgen edi.
«Ońtústik-shyǵystan jel soǵady. Túnde oblystyń batysynda, shyǵysynda, ońtústiginde, kúndiz basym bóliginde ekpini – 17-22 m/s. Atyraý qalasynda keı ýaqytta shańdy daýyl kútiledi. Ońtústik-shyǵystan jel soǵady, ekpini 15-20 m/s bolady», -dep habarlady «Qazgıdromet».
Eske sala ketelik, buǵan deıin Atyraýda ekinshi kún qatarynan shańdy daýyl soǵyp turǵanyn habarlaǵan bolatynbyz.
«Atyraý oblysynda «Qazgıdromet» RMK fılıalynyń málimetine sáıkes jeldiń uıytqýy sekýndyna 17-22 metrge jetedi. Keı jerlerde sekýndyna 25 metrge jetýi múmkin. Shańdy daýyl soǵady», - dep habarlaǵan bolatyn oblystyq tótenshe jaǵdaılar departamentiniń qoǵammen baılanys toby.
Sondaı-aq, qatty jeldiń saldarynan Kaspıı jaǵalaýyndaǵy qamys órti 5 kúnnen keıin sóndirildi.
Keıin Atyraý oblysynda Kaspıı jaǵalaýyndaǵy 3 gektarda qamys byqsyp jatqanyn jazǵan edik.
Oblystyq tótenshe jaǵdaılar departamenti qoǵammen baılanys tobynyń málimetinshe, búgin, 14 sáýirde jergilikti ýaqytpen saǵat 8:45-te qamystyń byqsyp jatqany anyqtalǵan.
«Atyraý qalasynda tútinniń ıisi sezildi. Osyǵan baılanysty tótenshe jaǵdaılar departamentiniń jedel toby Atyraý qalasyna jaqyn ornalasqan Damby aýylynan 30 shaqyrym qashyqtyqtaǵy Kaspıı teńiziniń jaǵalaýyna barlaý júrgizdi. Jedel top teńiz jaǵalaýyna jetken kezde qamystyń órtenbegenin anyqtady. Alaıda, «Aqjaıyq» memlekettik tabıǵı rezervatynda shamamen 3 gektar aýmaqta qamystyń tamyry byqsyp jatyr», - dep habarlady departamenttiń qoǵammen baılanys toby.
