Atyraýdy shańdy daýyl basyp tur

ATYRAÝ. QazAqparat – Búgin tańerteńnen beri Atyraý qalasyn shańdy daýyl basyp tur. Shańdy daýyl keshke deıin jalǵasýy múmkin, dep habarlaıdy QazAqparat tilshisi.

Oblystyq tótenshe jaǵdaılar departamentiniń qoǵammen baılanys toby turǵyndarǵa shańdy daýyl bolatyny týraly eskertý aqparatyn taratqan edi.

«14 qyrkúıekte Atyraý oblysynyń batysynda, soltústiginde, ońtústiginde naızaǵaı kútiledi. Ońtústik-shyǵystan jel soǵady. Túnde óńirdiń batysynda, ońtústiginde, kúndiz basym bóliginde jel ekpini 15-20 metr/sekýndqa jetedi. Oblystyń batysynda tótenshe órt qaýpi saqtalady», -dep habarlaǵan edi departamenttiń qoǵammen baılanys toby.

Búgin, 14 qyrkúıekte tańerteńnen beri munaıly shaharda shańdy daýyl kóterildi. Qazir qalany shańdy daýyl basty. Qatty jel soǵyp tur.

Tabıǵattyń tosyn qubylysyna baılanysty jedel áreket etetin «112», «101», «103» qyzmetterine oqys oqıǵalar, órt týraly habar túspegen.

Mamandardyń boljamyna qaraǵanda, qalada shańdy daýyl keshe, 13 qyrkúıekte saǵat 20:00-de bastalǵan. Shańdy daýyl búgin, 14 qyrkúıekte saǵat 20:00-ge deıin jalǵasýy múmkin.

Atyraý oblysynda mundaı shańdy daýyl buǵan deıin birneshe ret qaıtalanǵan. Munaıly óńir turǵyndary tabıǵattyń bul qubylysyn qalypty jaǵdaı retinde qabyldaıdy.

Eske sala ketelik, budan buryn Kaspıı jaǵalaýynda kefaldiń qyrylýy teńiz sýynyń jelmen jaıylýynan bolǵanyn habarlaǵan edik.