Atyraýdy shańdy daýyl basty
ATYRAÝ. QazAqparat – Búgin Atyraý oblysynyń aýmaǵyn shańdy daýyl basty, dep habarlaıdy QazAqparat.
Qatty soqqan jeldiń ekpini sekýndyna 20 metrge jetip, shańdy daýyldy kóterdi. Sonyń saldarynan Atyraý qalasy men birneshe shaǵyn aýdandy shańdy daýyl basty.
«Aýa raıynyń qolaısyzdyǵy erteń, 17 naýryzda da saqtalady. Bul kúni jyldamdyǵy sekýndyna 23 metrge jetetin qatty jel bolatyny kútilip otyr. Osyǵan baılanysty júrgizýshiler jolda júrý erejesine sáıkes, araqashyqtyqty saqtap, abaı bolǵany jón. Al, turǵyndar úlken ǵımarattardyń shatyrynan saq bolýy kerek» dep eskertedi Tótenshe jaǵdaılar departamenti.
Eske sala ketelik, budan buryn Atyraýda shańdy daýyl soǵyp turǵanyn jazǵan edik.
