Atyraýdy qalyń qar basyp, kólik qozǵalysy qıyndady
Atyraýda 6 aqpanda jaýǵan qar keshe, 7 aqpanda da tolastaǵan joq. Kún raıy buzylyp, ekpindi jel soqty.
«Qazgıdromet» RMM Atyraý oblystyq fılıalynyń bólim basshysy Aına Qazǵulovanyń aıtýyn qaraǵanda, mundaı qalyń qar sońǵy ret 2016 jyly jaýǵan. Sol jyly bir táýlikte Atyraý qalasynda qardyń qalyńdyǵy 34 sm, Inder aýdanynda 58 sm-ge jetken. Ózge aýdandarda 34-58 sm quraǵan.
Atyraý qalasynyń kóshelerinen qar tazalaýǵa keshe, 7 aqpanda «Arnaıy avtobaza» JShS-dan 250 jumysshy, 8 traktor, 22 samosval, 7 júktıegish, 3 topyraq shashatyn arnaıy kólik tartylǵan. Alaıda, bul kásiporyn jumysshylary qardy tazalap úlgere almaı jatyr.
«Eń aldymen, áleýmettik mańyzdy nysandar – mektepter men aýrýhanalardyń, balabaqshalardyń aýmaǵy, jaıaý júrginshi jolaǵy, qoǵamdyq kólikter júretin ortalyq joldar men kópirler tazartylyp jatyr. Qala aýmaǵynan 3 060 sharshy metr qar shyǵarylyp, jolǵa 85 tonna reagent sebildi. Bul jumys jalǵasa beredi», -deıdi kásiporyn basshysy Almas Іzteleýov.
Qalyń qar jolaýshy tasymaldaıtyn avtobýstar men jeńil kólikterdiń qozǵalysyn qıyndatty. Kólikter qarǵa batyp qalyp jatyr. Mundaı kórinis ásirese, Atyraý qalasynyń shetkeri kósheleri men shahar mańyndaǵy eldimekenderde kólikter jıi kezdesedi. Máselen, búgin Damby aýylynyń turǵyndary Atyraý qalasyna jete almaǵan.
«Smart Atyrau» kommýnaldyq memlekettik kásiporny dırektorynyń orynbasary Bolat Halıdollanyń málimetinshe, Atyraý qalasynda kún saıyn jolaýshy tasymaldaýǵa 200 avtobýs jolǵa shyǵady. Avtobýstar 31 baǵytty qamtıdy.
Alaıda, «AKZHAYIK Avtopark» JShS keshe 7 aqpanda saǵat 17:00-de Atyraý qalasyna irgeles ornalasqan eldimekenderge qatynaıtyn 50, 52, 53, 54, 55, 56, 58, 58A, 59, 62, 64-marshrýttaǵy qoǵamdyq kólikter qozǵalysyn toqtatty. Buǵan eldimekenderge jolaýshy tasymaldaıtyn avtobýstardyń qarǵa batyp, júrýi qıyndaǵany sebep bolǵan.
Sondaı-aq, kesheden beri «Atyraý-Saǵyz» baǵytyndaǵy qoǵamdyq kólik te toqtap tur. Saǵyz – Qyzylqoǵa aýdanyndaǵy temirjol stansasy. Avtobýs Atyraýdan keshki saǵat 17:00-de, al, Saǵyzdan tańǵy saǵat 06:00-de júredi.
Eske sala ketelik, Atyraý oblysynda eki kún mektep pen kolledjdegi sabaq onlaın formatta ótetinin jazǵan edik.
Ashyq kózderden alynǵan foto
