Atyraýdan Shymkentke jolaýshy tasymaldaǵan «platskart» avtobýs ustaldy
ATYRAÝ. QazAqparat – Atyraýda polıtsııa polıtsııa qyzmetkerleri «platskart» avtobýsty ustady, dep habarlaıdy QazAqparat.
Atyraýda «Qaýipsiz jol» profılaktıkalyq is-sharasy ótip jatyr. Atalǵan is-shara aıasynda patrýldik polıtsııa qyzmetkerleri keshe, 4 jeltoqsanda qaladaǵy «Bereke» shaǵyn aýdanynda «Vanffool» markaly avtobýsty toqtatqan.
«Atyraý-Shymkent» marshrýtyndaǵy avtobýstyń salonyn tekserý kezinde kólik quraly «platskartqa» aınalǵany belgili boldy. Salonda jolaýshy kreslosynyń ornyna qaptalǵan eki qabatty 28 kereýet ornatylǵan. Onda uıyqtap jatqan 17 jolaýshy anyqtaldy. Túrkistan oblysynda turatyn avtobýs júrgizýshileriniń aıtýynsha, «platskart» kólik Shymkent qalasyna baǵyt alǵan» dep habarlady oblystyq polıtsııa departamentiniń baspasóz qyzmeti.
Júrgizýshilerdiń birine qatysty QR Ákimshilik quqyq buzý kodeksiniń 590-babynyń 5,7 jáne 8-bólikteri, 571-babynyń 2-bóligi, 572-babynyń 1-bóligi boıynsha hattama toltyryldy. Avtobýs arnaıy turaqqa qoıyldy.
Eske sala ketelik, budan buryn Atyraýdan Shymkentke jolaýshy aparmaq bolǵan 2 avtobýstyń júrgizýshisi ustalǵanyn habarlaǵan bolatynbyz.
