Atyraýdan Shymkentke jolaýshy aparmaq bolǵan 2 avtobýs júrgizýshisi ustaldy
ATYRAÝ. QazAqparat – Atyraýda Shymkentke jolaýshy aparmaq bolǵan 2 avtobýs júrgizýshisi ustaldy, dep habarlaıdy QazAqparat tilshisi.
Bul derek Atyraý oblystyq polıtsııa departamenti men Kólikti baqylaý ınspektsııasy qyzmetkerleriniń birlesken reıdi kezinde anyqtalǵan.
« 27 shildede Atyraý qalasynyń Bereke yqshamaýdanynda «Atyraý-Shymkent» baǵytyna jolaýshy tasymaldaıtyn avtobýs toqtatyldy. Tekserý kezinde 36 jolaýshysy bar avtobýs júrgizýshisi karantın shekteýge qaramastan, jolaýshy tasymalymen aınalysqan. Sol kúni keshki saǵat 20:15-ter shamasynda «Atyraý-Oral» tas joly boıynda taǵy bir avtobýs toqtatyldy. Avtobýs salonyndaǵy 30 jolaýshy Shymkent qalasyna baǵyt alǵany anyqtaldy», -dep habarlady oblystyq polıtsııa departamentiniń baspasóz qyzmeti.
Karantın shekteýin saqtamaǵan avtobýs júrgizýshilerine qatysty QR Ákimshilik quqyq buzýshylyq týraly kodeksiniń 590-baby (kólik quraldaryn paıdalaný qaǵıdalaryn buzý), 571-baby (jolaýshylardy, bagajdy jáne júkterdi tasymaldaý qaǵıdalaryn buzý), sondaı-aq, 572-babymen (jolaýshylardy, bagajdy nemese júkterdi avtomobılmen tasymaldaýdy júzege asyrý kezinde júrgizýshilerdiń eńbek jáne demalys rejıminiń buzylýy) boıynsha ákimshilik hattamalar toltyryldy. Sonymen birge, avtobýs júrgizýshileriniń birine QR Ákimshilik quqyq buzýshylyq týraly Kodeksiniń 230-babymen (Qazaqstan Respýblıkasynyń mindetti saqtandyrý týraly zańnamasyn buzý) hattama rásimdelip, kólik aıyppul turaǵyna qoıyldy.
Eske sala ketelik, budan buryn Atyraýda polıtseıler qujatsyz janarmaı tasymaldaǵandardy ustaǵan bolatyn.
