Atyraýdan Reseıge qatynaıtyn joldyń eki ýchaskesinde qurylys jumysy aıaqtaldy
«Jol aktıvteri ulttyq sapa ortalyǵy» RMK Atyraý oblystyq fılıalynyń bólim basshysy Nurlan Jantýrınniń málimetinshe, respýblıkalyq mańyzy bar Atyraý-Astarhan tas jolynyń qurylys materıaldarynan 155 synama alynǵan.
Bul joldy qaıta jańǵyrtý 6 ýchaskege bólingen. Eki ýchaskede jol qurylys aıaqtalǵan. Joldyń 616-833 shaqyrym aralyǵyǵyndaǵy 4 ýchaskede jumys jalǵasyp jatyr.
Osy kezge deıin «Lankaran/Ajolqurylys», «Todini Constuzioni Generali S.p.A,», «Ant Insaat/Avtojolqurylys» jáne «SP SMS/ Todini Constuzioni Generali S.p.A» merdiger mekemeleri 80 shaqyrym joldyń tómengi qabatyna asfaltbeton tósegen.
«Bıyl 4 ýchaskede jol negiziniń joǵarǵy qabatyna qıyrshyqtas, jol jabyndysynyń tómengi qabatyna iri-túıirli ystyq asfaltbeton tóseý jumystary júrgizilip jatyr. Joldyń bul aralyǵynyń tómengi qabatyn bıyl tolyqtaı aıaqtaý josparlanǵan. Al, 853-893 shaqyrym aralyǵyn qamtıtyn 6-ýchaskege de asfaltbeton tóseldi. Qazir jol jıegindegi aıaldamalar men jol belgilerin, demalys alańdaryn salý bastaldy. Qurmanǵazy eldi mekeniniń tusynda jol ýchaskesin paıdalaný ǵımaratynyń qurylysy qolǵa alyndy. Bul nysandy joldy kútip ustaý jumystarymen aınalysatyn mekeme qyzmetkerleri paıdalanady. Úsh jyl buryn paıdalanýǵa berilgen 833-853 shaqyrym aralyǵyn qamtıtyn 5-ýchaske kepildik merziminde tur», - dedi Nurlan Jantýrın.
Mamandardyń aıtýynsha, byltyr bul joldaǵy kesheýildeýine materıaldardyń tapshylyǵy áser etken. Bıyl bul másele sheshimin tapqan.
Fılıal mamandary qys boıy osyndaǵy joldyń qurylysyna qajetti materıaldardan synama alyp, zertteý jumysyn júrgizgen.
«Jyl basynan beri respýblıkalyq jáne jergilikti joldardyń qurylysyna paıdalanylatyn materıaldardan alynǵan 155 synama tekserildi. Onyń ishinde 98 synama «Atyraý-Aqtóbe-Astarhan» tas jolynyń 330-893 shaqyrym aralyǵyndaǵy jol qurylysyna paıdalanylǵan materıaldardan alynǵan. Zerthanalyq tekseris qorytyndysyna sáıkes 17 synamanyń normatıvtik qujattarǵa saı kelmeıtindigi anyqtaldy», - dedi zerthana meńgerýshisi Gaýhar Atanchınova.
Eske sala ketelik, budan buryn bıyl Atyraýdan Reseı shekarasyna deıingi joldyń 137 shaqyrymy paıdalanýǵa beriletinin jazǵan edik.
