Atyraýdan Reseıge qatynaıtyn jol qurylysynan 61 aqaý tabyldy
«Jol aktıvteriniń ulttyq sapa ortalyǵy» RMK Atyraý oblystyq fılıalynyń sapa jáne memlekettik esep bóliminiń basshysy Nurlan Jantýrınniń málimetinshe, jyl basynan beri 74 jolǵa 848 ret tekserý júrgizilgen.
«Bizdiń fılıaldyń ınjenerleri joldardy tekserý kezinde 302 aqaýdy anyqtady. Onyń ishinde 65 óreskel aqaý bar. Al, jol qurylysyna paıdalanylǵan materıaldardan 1 470 synama alynyp, fılıal zerthanasynda tekserildi. Nátıjesinde 218 synamanyń standarttarǵa saı emestigi belgili boldy. Óreskel aqaýdyń biri qaıta jańǵyrtý jumystary júrip jatqan «Aqtóbe-Atyraý-RF shekarasy» respýblıkalyq jolynda anyqtalyp otyr», -deıdi Nurlan Jantýrın.
Onyń aıtýynsha, Atyraýdan Reseı shekarasyna deıin qatynaıtyn joldyń qurylysy 185 ret tekserilip, 61 aqaý anyqtalǵan. Onyń ishinde 17 aqaý áli joıylmaı otyr.
«Jobaǵa sáıkes uzyndyǵy 2 shaqyrym jol negiziniń joǵary qabatyna 5-40 fraktsııaly qara qıyrshyqtas tóselýi tıis. Alaıda, bul jerge 0-40 fraktsııaly qara qıyrshyqtas tóselgen. Kern alý kezinde jol jabyndysynyń tómengi qabatyna tóselgen asfaltbetonnyń qalyńdyǵy talapqa sáıkes kelmeıtini, asfaltbeton tóseýde jikteriniń tegistigi saqtalmaǵany anyqtaldy», - dep málim etti Nurlan Jantýrın.
Atalǵan jol qurylysyna paıdalanylyp jatqan materıaldardan alynǵan 523 synamaǵa saraptama jasalǵan. Nátıjesinde 74 synamanyń normatıvtik qujatqa saı emestigi belgili bolǵan. Máselen, qara qıyrshyqtastyń, qıyrshyqtastyń túıirshik quramy, kern keskinderiniń tyǵyzdyǵy, sýǵa qanyǵý koeffıtsıenti normaǵa saı bolmaı shyqqan.
Eske sala ketelik, buǵan deıin Atyraýda jyl basynan beri júk kólikteriniń ıelerine 46 mln teńge aıyppul salynǵanyn jazǵan edik.