Atyraýdan Reseıge qatynaıtyn jol qurylysy baıaý júrip jatyr

ATYRAÝ. QazAqparat – Atyraýdan Reseı Federatsııasynyń shekarasyna deıin qatynaıtyn jol qurylysy baıaý júrip jatyr. Bul týraly Atyraý oblysynyń Serik Shápkenov málim etti, dep habarlaıyd QazAqparat.

Oblys ákimi Atyraý qalasynan Reseı shekarasyna deıingi jol qurylysyn kólikpen júrip ótip tekserdi. Jańǵyrtylyp jatqan jol qurylysynyń 4 ýchaskesine jaýapty merdiger kompanııalar ókilderimen kezdesti.

«Memleket basshysy Qasym-Jomart Toqaev turǵyndar úshin asa qajetti kólik jolynyń máselesine erekshe nazar aýdaryp, naqty tapsyrma berdi. Men oblys turǵyndaryna osy joldaǵy jumystardyń barysyn baqylaýyma alatynymdy aıtyp, ýáde berdim. Keste boıynsha atqarylyp jatqan jumystarda kidiris bar. Bul týraly apta saıyn mamandardyń esebinen kóretin edim. Endi osyǵan osy sapar barysynda kózim jetti. Mundaı jumys qarqyny kestede belgilengen mejeden keshiktiredi. Sol sebepten, uıymdastyrý jumystaryn qolǵa alyp, tıisti sharalar qabyldaý qajet», - dedi Serik Shápkenov.

«QazAvtoJol» UK» AQ Atyraý oblystyq fılıalynyń dırektory Bolatbek Aıtbaevtyń málimetinshe, 217 shaqyrym joldyń 54 shaqyrymyna negizgi tósem salynsa, 45 shaqyrymyna qara qıyrshyq tas tóselgen.

«Joldyń 22 shaqyrymyna bir qabat asfalt-beton tóseldi. Onyń ishinde 20 shaqyrym jol paıdalanýǵa berildi. Qurmanǵazy aýylynan Atyraýǵa qaraı 833 shaqyrymnan bastap 12,5 shaqyrym, Isataı aýdanyndaǵy Janbaı men Aqqystaý aýyldary arasyndaǵy 7,5 shaqyrym jol ashyq. Endi taıaýda Janbaı men Aqqystaýdyn aralyǵyndaǵy joldy 10 shaqyrymǵa jetkizip, paıdalanýǵa beremiz. Osy aıdyń sońyna deıin Janbaı men Aqqystaýdyń arasyndaǵy 20 shaqyrym jol tolyǵymen ashylady. Sonda tamyz aıynyń sońyna deıin tómengi qabaty tóselip, barlyǵy 35 shaqyrym joldy ashý josparlanǵan», -deıdi Bolatbek Aıtbaev.

Onyń aıtýynsha, jol tóseý jumystaryna qajetti materıaldardyń jetispeýshiligi bar.

«Merdiger mekemeler jetkizýshilerge aqshasyn tólegenimen, qajetti ınertti materıal jetkiliksiz ekeni anyqtaldy. Máselen, bıtýmdy jetkizý máselesi qıyndyq týdyryp tur. Jalpy ýchaskeler boıynsha tehnıkalar jáne jumys kúshi jetkilikt»i, -dedi Bolatbek Aıtbaev.

Atyraý oblysynyń ákimi Serik Shápkenov salaǵa jetekshilik etetin orynbasary Qaırat Nurtaevqa jol qurylysy júrgizýdegi qıyndyqtardy salalyq mınıstrliktermen birlese sheshýdi tapsyrdy.

Eske sala ketelik, budan buryn Atyraýdan Reseıge qatynaıtyn joldyń 9 shaqyrymy paıdalanýǵa berilgenin jazǵan edik.