Atyraýdan Reseı Federatsııasynyń shekarasyna deıingi jol ýaqytsha jabyldy
Bul týraly Atyraý oblystyq polıtsııa departamentiniń baspasóz qyzmetinen málim etti.
«Búgin, 7 aqpanda jergilikti ýaqytpen saǵat 15:00-den bastap qolaısyz aýa raıyna baılanysty «Atyraý – Reseı Federatsııasynyń shekarasy» baǵytyndaǵy tas jol ýaqytsha jabyldy. Atyraý oblysynyń aýmaǵynda qalyń qardyń túsýine baılanysty barlyq jol qozǵalysyna qatysýshyǵa jolda júrý qaýipsizdigin qatań saqtaý qajettigin eskertemiz», -dep habarlady departamenttiń baspasóz qyzmeti.
Atalǵan baǵyttaǵy jol Atyraý oblysyn Reseı Federatsııasynyń Astrahan óńirimen baılanystyrady. Qazaqstan men Rseı úkimetteriniń qarjylandyrýymen eki el shekarasyndaǵy Qıǵash ózeniniń ústinen kópir salynǵan.
Shekaraǵa deıingi joldyń uzyndyǵy – 277 shaqyrym. Kúre joldyń boıynda Atyraý oblysynyń Isataı jáne Qurmanǵazy aýdanynyń eldimekenderi ornalasqan.
Eske sala ketelik, buǵan deıin Atyraý oblysynda eki kún mektep pen kolledjdegi sabaq onlaın formatta ótetinin habarlaǵan bolatynbyz.
Atyraý oblysynda mektep pen kolledjdegi sabaqty onlaın formatta ótkizýge kún raıynyń qolaısyzdyǵy sebep bolǵan.
«Atyraý oblysynda kún raıynyń qolaısyzdyǵyna baılanysty qala jáne aýdandardaǵy mektepterde 0-11 synyp oqýshylary, kolledj stýdentteri sabaqty búgin, 7 aqpan tústen keıin onlaın formatta oqyp jatyr. Sabaqty onlaın formatta ótkizý ádisi erteń, 8 aqpanda da jalǵasady», - dep habarlady oblystyq bilim basqarmasynyń baspasóz qyzmeti.