Atyraýdan kelip, Oralda 15 velosıped jymqyrǵan ury qolǵa tústi
ORAL. QazAqparat – Atyraýdan kelip, Oralda 15 velosıped jymqyrǵan ury qolǵa tústi, dep habarlaıdy QazAqparat tilshisi.
BQO polıtsııa departamentiniń baspasóz qyzmetinen túsken málimetke qaraǵanda, atyraýlyq 26 jastaǵy ury eki aı boıy Oralda osyndaı «kásip» jasaǵan.
Ol qyrkúıek aıynan beri keshki 18.00 men túngi 23.00 saǵat aralyǵynda kózine túsken velosıpedterdi urlap, satýmen aınalysqan.
Atyraýdan kelgen «gastroler» 5 qarasha kúni qala ortalyǵynda kezekti velosıped urlap jatqan jerinen qolǵa tústi. Ol D.Qonaev shaǵynaýdanynda 41 jastaǵy áıelge tıesili velosıpedti qoldy qylyp, 40 myń teńge zalal keltirgen.
Esh jerde jumys istemeıtin kúdikti aıybyn moıyndap, 15 velosıpedti qalaı urlaǵanyn aıtyp berdi.
Qazirgi kezde QR QK 188-babyna sáıkes 15 epızod boıynsha tergeý amaldary júrgizilýde.
Aıta keteıik, bıylǵy toǵyz aıda qalada 47 velosıped urlyǵy tirkelip, sonyń 30-y ıelerine qaıtarylǵan.
