«Atyraýdan Altaıǵa deıin» etno-mádenı ekspedıtsııasy uıymdastyrylady
ASTANA. QazAqparat - 2018 jyldyń 2-jartyjyldyǵynda «Atyraýdan Altaıǵa deıin» etno-mádenı ekspedıtsııasy uıymdastyrylady. Bul týraly Atyraý oblysynyń ákimi Nurlan Noǵaev aıtty, dep habarlaıdy QazAqparat.
Aqordada ótken QR Prezıdenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi ulttyq komıssııanyń kezekti otyrysynda beınekonferentsııa baılanysy rejiminde esep bergen Nurlan Noǵaev «Rýhanı jańǵyrý» baǵdarlamasyn iske asyrý aıasynda óńirde atqarylǵan jumystarǵa esep berdi. Sonymen qatar ol aǵymdaǵy jylǵy josparlarymen de bólisti.
«2018 jyly atqarylǵan jumystar jalǵasyn taýyp, sapalyq deńgeıi men nátıjeliligine basa nazar aýdarylady. Baǵdarlama aıasynda bıyl oblysymyzda 6 mlrd teńgege 100 jobany júzege asyrý josparlanyp otyr. Jalpy alǵanda 500-ge jýyq is-sharalar uıymdastyrylyp, oǵan 300 myńnan astam adam tartý kózdelýde»,- dedi ol.
Óńir basshysynyń aıtýynsha, aǵymdaǵy jyly oblystyń barlyq aýdandary men iri oqý oryndarynda kishi jobalyq keńselerdi qurý jumystary júrgiziledi. Búginde oblystyń 2 aýdanynda, 3 joǵary oqý ornynda, 2 orta bilim berý uıymynda kishi jobalyq keńse qurylyp, jumystaryna kirisken.
«Sonymen qatar oblystaǵy aýyldyq kitaphanalar jelisin jańǵyrtý jobasy bastaý aldy. 2018 jyly oblys boıynsha 8 kitaphana jańa formattaǵy mádenı-aǵartý ortalyǵyna aınalady. 2018 jyldyń birinshi jartyjyldyǵynda rýhanı qundylyqtarymyzdy nasıhattaý maqsatynda «Ulttyq salt-dástúr» halyqaralyq festıvalin jáne ekinshi jartyjyldyǵynda aımaqaralyq baılanysty nyǵaıtý úshin «Atyraýdan Altaıǵa deıin» etno-mádenı ekspedıtsııasyn uıymdastyrý josparlanýda», - dedi Nurlan Noǵaev.
