Atyraýdan 30 shaqyrym jerde 6 gektar qamys janyp jatyr
ATYRAÝ. QazAqparat – Atyraý qalasynan 30 shaqyrym qashyqta 6 gektar qamys janyp jatyr. Keshe keshte bastalǵan órtten eldi mekenderge qaýip tónip turǵan joq, dep habarlaıdy QazAqparat tilshisi.
Oblystyq tótenshe jaǵdaılar departamentiniń qoǵammen baılanys tobynan málim etkendeı, qamys órti keshe, 14 qyrkúıek kúni saǵat 20:40-ta tutanǵan.
«Atyraý qalasyna taıaý ornalasqan Keńózek aýyldyq okrýgine qarasty Alǵabas kentinen 15 shaqyrym kashyqtyqta shamamen 4 gektar aýmaqta qamys órtendi. Qamys órtin sóndirýge oblystyq tótenshe jaǵdaılar departamentinen 8 qyzmetker, 2 tehnıka, «Aqjaıyq» memlekettik tabıǵı rezervatynan 3 qyzmetker, 1 tehnıka, Keńózek okrýgindegi sharýa qojalyǵynan 3 qyzmetker, 3 traktor jumyldyryldy. Órt baqylaýǵa alyndy», -dep habarlady departamenttiń qoǵammen baılanys tobynan.
Al, búgin, 15 qyrkúıekte tańerteń departamenttiń 2 qyzmetkeri, «Aqjaıyq» memlekettik tabıǵı rezervatynan 15 adam 4 tehnıkamen qamys janǵan aýmaqta kezekshilik atqarýǵa shyqqan.
«Búgin jergilikti ýaqytpen saǵat 13:00-degi málimeke sáıkes, Keńózek aýyldyq okrýgindegi Alǵabas kentinen Kaspıı teńizine qaraı 30 shaqyrym qashyqta shamamen 6 gektar aýmaqta qamys byqsyp jatyr. Eldi mekenderge qaýip tónip turǵan joq. Dál qazir oblystyq tótenshe jaǵdaılar departamentiniń 2 qyzmetkeri 1 TREKOL kóligimen, «Aqjaıyq» memlekettik tabıǵı rezervatynyń 30 qyzmetker 10 tehnıka qamys órtiniń órshimeýin qaraýyldaýǵa jumyldyryldy», -dep málim etti departamenttiń qoǵammen baılanys tobynan.
Eske sala ketelik, budan buryn Atyraýda qurǵaq shóptiń órtenýine traktordan shyqqan ushqyn sebep bolǵanyn habarlaǵan edik.
