Atyraýdaǵy jylqylar parazıttik aýrýlardan qyrylǵan

NUR-SULTAN. QazAqparat - Sharýalarǵa ǵylymı-praktıkalyq kómek kórsetý, epızootologııalyq zertteýler júrgizý jáne jylqylardyń aýrýyna dıagnoz qoıý úshin synama alý maqsatynda Qazaq veterınarııalyq jáne Bıologııalyq qaýipsizdik problemalary ǵylymı-zertteý ınstıtýttarynyń qyzmetkerleri Atyraý oblysyna bardy, dep habarlaıdy QazAqparat Aýyl sharýashylyǵy mınıstrligine silteme jasap.

Zertteý nátıjesinde janýarlardan delıafondıoz, gastrofılez jáne paraskarıdoz parazıttik aýrýlary anyqtaldy. Qolda bar derekter boıynsha, bul aýrýlar - janýarlardyń jappaı qyrylýy men aýrýynyń negizgi sebebi. Aýrýmen kúresý úshin ǵalymdar janýarlardyń ıeleri men veterınarlarǵa parazıttik aýrýlar jáne gelmıntozdardyń aldyn alý, ýaqytly emdeýdi usynady .

Aýyl sharýashylyǵy mınıstriniń buıryǵy boıynsha janýarlardyń asa qaýipti aýrýlary tizbesine sáıkes profılaktıka, dıagnostıka jáne joıý bıýdjet esebinen júrgiziledi. Qalǵan aýrýlardyń, onyń ishinde parazıttik aýlardyń veterınarııalyq is-sharalary janýarlar ıeleriniń esebinen júrgiziledi.

QR AShM Veterınarlyq baqylaý jáne qadaǵalaý komıteti mamandardyń oblysqa jasaǵan saparlarynyń qorytyndysy boıynsha arnaıy jınalys ótkizdi. Jıynǵa Qazaqstannyń jylqy ósirýshiler qaýymdastyǵynyń músheleri, ǵalymdar, AShM aýmaqtyq ınspektsııasynyń jáne ákimdiktiń ókilderi qatysty.

Kezdesý qorytyndysy boıynsha mınıstrlik fermerlermen kezdesý alańyn usynýǵa, al ǵylymı-zertteý ınstıtýttarynyń mamandary olarǵa jan-jaqty qoldaý kórsetip, janýarlardy dıagnostıkalaý men emdeýdiń tıimdi ádisteri týraly kómek kórsetýge daıyn ekendikterin jetkizdi.

Epızootııalyq jaǵdaı QR Aýyl sharýashylyǵy mınıstrliginiń baqylaýynda.

Buǵan deıin AShM Atyraý oblysyndaǵy epızootııalyq jaǵdaıǵa qatysty Qurmanǵazy jáne Isataı aýdandarynda 26 jylqydan aýrý anyqtalǵanyn málimdegen bolatyn.