Atyraýdaǵy Jaıyq ózeninen 5 tonna óli balyq jınaldy
ATYRAÝ. QazAqparat - Jaıyq ózenindegi balyqtardyń jappaı qyrylý sebepterin anyqtaý maqsatynda tergeý júrip jatyr, dep habarlaıdy QazAqparat tilshisi.
«Qazirgi tańda óńirde vedomstvoaralyq komıssııa balyqtyń qyrylý sebepterin anyqtaýǵa kirisip ketti. Onymen qosa, qyrylǵan balyqty jınaý jumysy júrip jatyr. Osy ýaqytqa deıin 5 tonna óli balyq jınaldy», - dep málim etti QR aýyl sharýashylyǵy mınıstrligi orman sharýashylyǵy jáne janýarlar álemin qorǵaý komıtetiniń baspasóz qyzmeti.
Komıtet málimetinshe, ózen sýynan ammıak tabyldy degen aqparat jalǵan. Negizi ammıak sýdan emes, balyqtan tabylǵan.
Eske sala keteıik, Jaıyq ózenindegi balyqtardyń jappaı qyrylý sebebin anyqtaý úshin ózenge sý aǵyzatyn 4 kásiporyn tekserilip jatyr. Atyraý oblystyq ekologııa departamenti bas memlekettik ınspektory Qaıratqalı Haırýllanyń aıtýynsha, mamandar «Atyraý Sý Arnasy» MKK, «Atyraý TETs» AQ, «Bekire balyǵyn ósiretin Oral-Atyraý zaýyty» men «Atyraý bekire balyǵy zaýytyn» tekserýde.
Budan buryn Atyraýda Jaıyq ózenindegi balyqtardyń neden qyrylǵany aıtylǵan bolatyn.
«Jaıyq ózenindegi ólgen balyqtyń synamasyn zerthanada taldaýdan ótkizgende, odan ammıak tabyldy. Qazirgi tańda bul zattyń ózenge qalaı túskeni anyqtalyp jatyr», - dep habarlady veterınarlyq baqylaý jáne qadaǵalaý komıtetiniń aýmaqtyq ınspektsııasynyń basshysy Ǵalymbek Bısenǵalıev.
Avtor: A.Sokolov
