Atyraýdaǵy jarylys: denesin kúıik shalǵan 4 adam aýrýhanaǵa tústi

ATYRAÝ. QazAqparat –Búgin Atyraýda gaz quıý stansasynda oryn alǵan jarylystyń mán-jaıy belgili boldy. Órtke ulasqan jarylystan kúıik alǵan 4 adam aýrýhanaǵa tústi, dep habarlaıdy QazAqparat.

«Atyraý qalasynda tańerteńgi saǵat 8:42-de «PromGaz» JShS-niń Atambaev kóshesinde ornalasqan gaz stansasy aýmaǵynda jarylys oryn aldy. Oǵan gaz quıý kezinde gazdyń shyǵýy sebep bolǵan. Sol sátte «Ford» markaly avtotsısternaly kóliktiń kabınasy jalynǵa orandy. Jarylys kezinde 60-70 metr qashyqta turǵan ǵımarat qırady» -dep habarlady oblystyq Tótenshe jaǵdaılar departamentiniń baspasóz qyzmeti.

Sondaı-aq, jarylystan kúıik shalǵan 4 adam aýrýhanaǵa jetkizilgen. Olar –Tótenshe jaǵdaılar departamentine qarasty órt sóndirý bóliminiń bólimshe komandıri men órt sóndirýshi, sondaı-aq gaz tasýshy kóliktiń júrgizýshi jáne janar-jaǵar maı quıýshy.

«Órt saǵat 9:58-de tolyqtaı sóndirildi. Tilsiz jaýdy aýyyzdyqtaýǵa Tótenshe jaǵdaılar departamentiniń 25 qyzmetkeri men 4 tehnıka jumyldyryldy», -dedi baspasóz qyzmetinen.

Buǵan deıin Atyraýda gaz quıý stansasynda jarylys bolǵanyn habarlap edik.