Atyraýdaǵy jarylys: Aýrýhanaǵa túsken úsh naýqastyń ekeýi kóz jumdy
ATYRAÝ. QazAqparat – Atyraýda jeke úıdegi jarylystan keıin aýrýhanaǵa túsken úsh naýqastyń ekeýi kóz jumdy, dep habarlaıdy QazAqparat.
Buǵan deıin Atyraýda jeke úıde jylý qazandyǵy jarylǵanyn jazǵan edik.
Jarylys 10 qarashada túngi saǵat 1:24-te Atyraý qalasynyń Balaýsa shaǵyn aýdanyndaǵy jeke úıde bolǵan.
Tótenshe jaǵdaı departamenti baspasóz qyzmetiniń málimetinshe, jarylys saldarynan jalpy kólemi 120 sharshy metr bolatyn turǵyn úı otqa orandy. Turǵyn úıdiń tóbe jabyndysy men bólmeleri tolyqtaı órtenip ketti. Órt saǵat 2:15-te oqshaýlanyp, saǵat 2:40-ta óshirilgen edi.
Keıin oblystyq densaýlyq saqtaý basqarmasynyń baspasóz qyzmeti aýrýhanaǵa túsken úsh adamnyń jaǵdaıy aýyr ekenin habarlady.
Naýqastyń ekeýi – 19 jastaǵy eki jigit jansaqtaý bólimshesine túsken. Al, úshinshisi – 22 jastaǵy boıjetken.
Jansaqtaý bólimshesindegi naýqastyń biriniń denesin 90%, ekinshisinde 85-90% kúıik shalǵan. Ekeýiniń de jaǵdaıy óte aýyr. Naýqastyń ekeýi de jasandy tynys alý apparatyna qosylǵan. Al, 1999 jylǵy boıjetken 25-30% kúıikpen neırotravmatolgııa bólimshesine tústi. Onyń da jaǵdaıy aýyr.
«Oblystyq aýrýhananyń jansaqtaý bóliminiń dárigerleri II jáne III dárejeli kúıikpen túsken 19 jastaǵy eki jigitke medıtsınalyq em-dom sharalaryn júrgizdi. Alaıda, keshe, 14 qarashada denesiniń 85-90%-yn kúıik shalǵan 2002 jylǵy jigittiń biri qaıtys boldy. Al, búgin, 15 qarashada 90-95% kúıik alǵan ekinshi naýqas – 19 jastaǵy jigit kóz jumdy» -dep málim etti basqarmanyń baspasóz qyzmetinen.
