Atyraýdaǵy velosherýge ıtalııalyq ekstremal qatysady
ATYRAÝ. QazAqparat - Esimi Gınnestiń Rekordtar kitabyna engen ıtalııalyq ekstremal Atyraýdaǵy velosherýge qatysady, dep habarlaıdy QazAqparat tilshisi.
«Vıttorıo Brýmottı Astana týraly tańǵajaıyp vıdeoǵa túsken soń Qazaqstanda tanymal bola ketti. Onda ekstremal eshqandaı saqtandyrýsyz kópirge shyqqan. Vıttorıo Brýmottıdiń qatysýymen vıdeo túsirý bastamasyn Olımpıada chempıony Aleksandr Vınokýrov usyndy. Aldaǵy velosherýge Vınokýrov ta, onymen birge «Astana» velokomandasy, Atlanta Olımpıadasynyń chempıony Zýlfııa Zabırova, Ilıa Ilın de qatysady. Velosherý sońynda qazaq estrada juldyzdarynyń qatysýymen kontsert bolady», - deıdi «Atyraý oblysy sportty qoldaý jáne damytý» qoǵamdyq qorynyń ókili Tańat Nurshın.
Shara aıasynda qaıyrymdylyq jármeńkesi jáne «Astana» velokomandasy lottarynyń aýktsıony bolady. Odan túsken qarajattar Atyraý oblysyndaǵy velosport mektebine qurylǵylar alýǵa jumsalady.
Uıymdastyrýshylardyń aıtýynsha, velosherýdi jyl saıynǵy dástúrge aınaldyrý josparlanyp otyr.
Qashyqtyq 9 shaqyrymǵa sozylady. Veloshabandozdar oblystyq Qazaq akademııalyq drama teatrynyń aldyndaǵy alańnan bastap, Beıbarys alańynda sherýdi aıaqtaıdy. Tirkeý tańǵy 8:00-de bastalady. Velosherýge myna silteme arqyly ótip jazylýǵa bolady.
Foto: 2.bp.blogspot.com
