Atyraýdaǵy velosherýge 1,5 myńnan astam qala turǵyny qatysty
ATYRAÝ. QazAqparat - Atyraýda qala kúni merekesine oraı buqaralyq velosherý ótkizildi, dep habarlaıdy QazAqparat Habar 24 telearnasy silteme jasap.
Salaýatty ómir saltyn nasııhattaýǵa baǵyttalǵan sharaǵa 1,5 myńnan astam qala turǵyny qatysty. Oblys ortalyǵynyń birneshe kóshesin basyp ótken jalpy qalalyq velosherýge qatysýshylar 10 shaqyrymǵa jýyq qashyqtyqty baǵyndyrdy. Sporttyq merekege qatysqan jandardyń arasynda alpysty alqymdaǵan aqsaqaldar da, alty jastaǵy balalar da bar. Al orta jastaǵy qyzmetten únemi qoly bosamaıtyn jumysbasty turǵyndar úshin bul naǵyz sporttyq báseke boldy. Al sherý sońy shaǵyn merekege ulasyp, úzdikter marapattaldy.
«Búgin velosherýge qatystyq. Babymyzdy joǵaltpappyz. Bul densaýlyqty saqtaýǵa, ary qaraı óz-ózińdi babyńda ustaýǵa qajet dep esepteımin. Sondyqtan barsha qazaqstandyqtardy sportpen únemi shuǵyldanyp turýǵa shaqyrar edim», dedi velosherýge qatysýshy
Salamat Sabyr.
Foto ATPress.kz
