Atyraýdaǵy úılený toıynda kókpar tartylyp, balýandar beldesti
ATYRAÝ. QazAqparat - Atyraý oblysy Qyzylqoǵa aýdanyndaǵy Jangeldın aýylynda erekshe toı boldy. Jas jubaılardyń úılený toıynda kókpar tartylyp, balýandar beldesip, at jarystyryldy, dep habarlaıdy QazAqparat tilshisi.
Temirbek pen Qymbattyń shańyraq kóterý toıynda mektep oqýshylary arasynda qazaq kúresi, eresekter arasynda túıe balýandar beldesýi, taı jarysy men kókpar tartysy sııaqty ulttyq oıyn túrleri uıymdastyryldy.
Úılený toıyna jınalǵan qaýym eń birinshi oqýshylar arasynda qazaq kúresin tamashalady. Qajymuqan atalarynyń jolyn qýǵan balǵyn balýandardyń beldesýinde Atanııaz Dálýbaıdyń baǵy jansa, ekinshi oryndy Aqjol Járdemǵalı, úshinshi oryn Nurhat Jylqybaevqa buıyrdy. Al, eresekter arasynda Nurbek Eginbaevtiń jaýyryny jerge tımeı, «Túıe balýan» ataǵyn ıelendi.
Budan keıin jınalǵanjurtshylyqtyń nazary taı jarysyna aýdy. On eki taı arasyndaǵy tartysty dodada Azat Rashıdtiń aty báıgeden ozyp keldi.
Sonymen qatar, aýdan jastary den qoıyp júrgen kókpar oıyny da tartysty ótti. Úsh komanda qatysyp, baqtaryn synaǵan dodada «Suńqar» toby jeńiske jetti.
«Dostarymyzben aqyldasyp, halqymyzdyń salt-dástúrlerin, ulttyq sport túrlerin, salaýatty ómir saltyn nasıhattaý úshin osyndaı sharany uıymdastyrdyq. Ulttyq sport oıyndary tek qana belgili bir merekelerde emes, túrli toılarda, as berýlerde uıymdastyryp tursaq jas jetkinshekterdiń oǵan degen qyzyǵýshylyǵy artatyny sózsiz, - deıdi erekshe toıdy uıymdastyrýshy Ashat Esenqulov.
Avtory: Abaı AQMURZIEV
