Atyraýdaǵy túzeý mekemelerine 16 elektrondy termınal ornatyldy
Atyraý oblysy prokýrorynyń orynbasary Nurjan Serikulynyń aıtýynsha, azaptaý týraly isterdi tergep-tekserý prokýratýra organdaryna júktelgen.
«Memleket basshysy azaptaýǵa jol berýge bolmaıtynyna, árbir buzýshylyq faktisi boıynsha tıisti sharalar qabyldanýy qajettigine kóńil aýdaryp otyr. Osyǵan oraı azaptaýdy túbegeıli joıý jáne ony boldyrmaý maqsatynda Qylmystyq-atqarý júıesindegi penıtentsııarlyq mekemeler jappaı beınebaqylaý kameralarymen jabdyqtaldy. Prokýrorlar kameralar arqyly únemi onlaın (qashyqtan) monıtorıng júrgizip, qamaýda otyrǵandardyń quqyqtarynyń saqtalýyna qadaǵalaý júrgizýde», -dep habarlady Nurjan Serikuly.
Onyń aıtýyna qaraǵanda, túzeý mekemeleriniń qoljetimdi jerlerine 16 elektrondy termınal ornatylǵan. Bul sottalǵandardyń prokýratýraǵa jáne basqa da memlekettik organdarǵa ótinish berý rásimin jeńildetken.
«Sottalǵandarǵa ótinish joldaýdyń tártibi túsindirildi. Termınal qamaýdaǵylardy JSN jáne bıometrııalyq málimetteri arqyly tanıdy. Saýsaq izderin skanerlegennen keıin termınal ótinishti qabyldap, arnaıy talon beredi. Bastysy, bul protsesterdiń barlyǵy mekeme ákimshiliginiń qatysýynsyz júzege asyrylady. Olardyń zańsyz áreketterine kedergisiz shaǵymdanýǵa múmkindik beredi. Bul zań buzýshylyqtardyń aldyn alýǵa, ýaqytyly anyqtaýǵa jol ashady», -dep málim etti Nurjan Serikuly.
Eske sala ketelik, buǵan deıin Atyraý polıtseıleriniń 2 myńnan astam zańsyz qaýlysynyń kúshi joıylǵanyn jazǵan bolatynbyz.
Polıtsııa qyzmetkeriniń qaýlylarymen jeke tulǵalar QR Ákimshilik quqyq buzý týraly kodekstiń 612-babynyń 1-bóligimen, ıaǵnı júrgizýshiniń jeke basyn kýálandyratyn qujatynyń bolmaýyna baılanysty jaýapqa tartylǵan.
Atyraý qalasynyń prokýrory engizgen narazylyqpen atalǵan bappen ákimshilik quqyq buzýshylyq týraly isterge shyǵarylǵan 1 079 qaýlynyń kúshi joıyldy. Jalpy 2 myńnan astam ákimshilik qaýlynyń kúshi joıylyp, 24 polıtsııa qyzmetkeri tártiptik jaýapkershilikke tartyldy.
