Atyraýdaǵy taǵzym etý sharasyna úsh bozdaqtyń urpaqtary keldi
Bozdaqtardy aza tutýǵa oblystyq ardagerler keńesiniń, Qazaqstan halqy assambleıasynyń músheleri, mekeme, kásiporyn jáne eńbek ujymdarynyń qyzmetkerleri jınaldy. Olardyń qatarynda saıası qýǵyn-súrginge ushyraǵan azamattardyń urpaqtary da boldy.
Aıta ketelik, qazir Atyraý oblysynda saıası qýǵynnyń zardabyn shekken 7 myńnan astam adam tirkelgen. Qazir aımaqta jazyqsyz japa shekken 10 adamnyń urpaǵy ómir súredi. Búgingi sharaǵa zulmat jyldary qııanat kórgen úsh azamattyń balalary men nemere-shóbereleri keldi.
Jıynda sóılegen oblys ákimi Nurlan Noǵaev rýhanı jańǵyrý Alashtyń arystaryn ardaqtaýda qasterli isterin qurmetteýde basty qundylyq bolýy qajet dedi. «Bolashaqqa baǵdar berip, qoǵamnyń órkenıet kóshine ilesip, damýyna yqpal jasaıtyn kókiregi oıaý, kózi ashyq zııalylardy aramyzdan alyp ketip atyp tastady, ıtjekkenge aıdady. Júz myńdaǵan adam elimizdiń jarqyn bolashaǵy jolynda qurban boldy. Sol jyldary kóptegen kórnekti qaıratkerler jáne ózge ulttyń ókilderi eriksiz Qazaqstan jerine aýyp keldi. Qushaǵy ashyq keńpeıil halqymyz olardy túrine, tiline, dinine qaramaı týysyndaı baýyryna basty. Azattyq jolynda qurban bolǵan azamattardy eske saqtaı otyryp, árqaısymyzdy el damýyna aıanbaı qoldan kelgenshe qyzmet atqarýǵa shaqyramyn», - dedi oblys ákimi.
Aıta ketelik, Qazaqstan boıynsha 103 myńǵa jýyq azamat saıası qýǵanǵa ushyrady. Olardyń 25 myńy atý jazasyna kesilgen. Sol kezde Qazaqstanǵa jer aýyp kelgen 1,5 mıllıon ózge ult ókili atamekenimizde pana tapty.
