Atyraýdaǵy «Shańyraq» balalar aýylynyń eki tárbıeshisi tárbıelenýshilerdi urǵan
Ótken aptada Bala quqyqtary jónindegi ýákil Dınara Zakıeva «Shańyraq» balalar aýylyndaǵy ahýalmen tanysyp, tárbıelenýshilermen kezdesken.
«Atyraý qalasyndaǵy «Shańyraq» balalar úıinde turatyn balalarmen kezdesip, áńgimelestik. Balalar arasynda anonımdi saýalnama júrgizdim. Árqaısysymen sóılesip shyqtym, beınekameralardyń jazbalaryn zerttedim. Nátıjesinde eki tárbıeshiniń qol kóterýi, balalar as úıde ýaqyttyń basym bóligin ana-tárbıeshiniń qatysýynsyz ótkizgen, keıbir tárbıelenýshi balalardyń arasyndaǵy konflıktiler, úıde bóten eresek adamnyń bolýy, beınekameralar jazbalarynyń saqtalýy men merzimi sekildi kemshilikter anyqtaldy. Osyǵan baılanysty tekserý jáne odan ári sharalar qabyldaýy úshin oblys ákiminiń orynbasaryna aqparat berdim. Endi Bas prokýratýraǵa jiberemin», -deıdi Dınara Zakıeva áleýmettik jelidegi paraqshasynda.
Onyń aıtýynsha, balalar kim bolǵysy keletini jaıly aıtyp, kókeıdegi ýaıymdarymen bólisken. Ýákildiń nómirin jazyp alyp, hat almasyp turýǵa kelisken.
«Balalar úıinde jáne odan keıin ákimdikte oblystyń qoǵam belsendilerimen, ÚEU kezdestik. Qoǵam ókilderiniń pikirleri men kózqarasy ár túrli ekenine qaramastan, báriniń maqsaty bir – balalardyń ál-aýqaty men qaýipsizdigi jáne olardy manıpýlıatsııadan, eresekter arasyndaǵy kıkiljińnen qorǵaý. Qazir eń bastysy – tekseristiń obektıvtiligi, balalardyń múddelerin qorǵaýdy qamtamasyz etý maqsatynda zańǵa sáıkes sharalar qabyldaý. Sonymen qatar, jaqynda balalar úıiniń dırektorlyǵyna baıqaý jarııalanady, kameralar sany kóbeıtilip, olardy únemi baqylaý júrgizip otyrý úshin bilim basqarmasyna qosady», -deıdi Dınara Zákıeva.
Eske sala ketelik, buǵan deıin Atyraýda balalar aýylynyń dırektory jumysynan shettetilgen edi.
Keıin oblys ákiminiń orynbasary Jasulan Bısembıev balalar aýylyndaǵy jaıtqa oraı pikir bildirgen bolatyn.
