Atyraýdaǵy «Shańyraq» balalar aýylynda tárbıelenýshilerdiń quqyǵy shektelgen
Áleýmettik jelide Nurdáýlet esimdi balaǵa qatysty vıdeo júktelgen.
Atyraý oblysy ákiminiń orynbasary Jasulan Bısembıevtiń aıtýynsha, Qazaqstan Prezıdenti janyndaǵy Balalar quqyqtaryn qorǵaý jónindegi ýákil Dınara Zakıevamen birge otbasy úlgisindegi «Shańyraq» balalar aýylyndaǵy jaǵdaı zerdelengen.
«Túıgen oıym – sońǵy kezde áleýmettik jelide talqylanyp jatqan jaıttar ujymda buryn qyzmet etip ketken jumysshy men burynǵy basshy arasyndaǵy kelispeýshiliktiń nátıjesi. Sonyń saldarynan balalar zardap shegip otyr. Jelide jarııalanǵan túrli jazbalardan eki tarap ózin aqtap alýǵa tyrysyp jatqanyn kórýge bolady. Balany ózine tartyp, túrli vıdeo taratýdyń artynda balanyń quqyǵyn shekteý máselesi tur. Mundaǵy balalar – memlekettiń erekshe qorǵaýyndaǵy balalar. Sondyqtan balalardyń quqyǵyn qorǵaýǵa arnalǵan barlyq shara qabyldanatyn bolady. Oǵan qosa, áleýmettik jelide taraǵan jaıttar balalardyń ózderin qatty alańdatyp, bolashaǵyna keri áseri tıetinin oılap otyrǵanyn baıqadym», -dep habarlady Jasulan Bısembıev.
Onyń aıtýyna qaraǵanda, «Shańyraq» balalar aýylyna jańa dırektor taǵaıyndalady. Qazir konkýrs jarııalanǵan.
«Pedagogıka salasynda mol bilimi men tájirıbesi bar mamandardy osy konkýrsqa qatysýǵa shaqyramyn. «Shańyraq» balalar aýylyndaǵy beınebaqylaý júıesi kúsheıtiledi. Qazir munda 64 beınekamera bar. Biraq qosymsha kamera qoıý qajettiligi bar dep esepteımin. Kameralar Bilim basqarmasyna tikeleı qosylatyn bolady. Munda baspasóz qyzmeti ashylyp, balalar aýylyndaǵy jarııalylyqty qamtamasyz etedi. Jýyqta «Shańyraqtan» shyqqan balalardy ómirge tez beıimdeýge baǵyttalǵan tálimgerlik jobasy engiziledi. Balalarǵa qatysty túrli vıdeolar jarııalap, aqparat taratýdyń artynda balalardyń quqyǵyn shekteý ári quqyqtyq jaýapkershilik máselesi bar ekenin atap ótkim keledi», - dep málim etti Jasulan Bısembıev.
Eske sala ketelik, budan buryn Atyraýda balalar aýylynyń dırektory jumysynan shettetilgenin jazǵan edik.
