Atyraýdaǵy shańdy daýyl: Tótenshe jaǵdaı baqylaýǵa alyndy
ATYRAÝ. QazAqparat – Atyraýda jeldiń kúsheıýinen týyndaǵan jaǵdaı baqylaýǵa alyndy, dep habarlaıdy QazAqparat.
Atyraý oblysy ákiminiń orynbasary Qaırat Bekenovtyń tóraǵalyǵymen kúshti jelge baılanysty quzyrly sala basshylarynyń qatysýymen shuǵyl jıyn ótti.
Jıynda tótenshe jaǵdaılar departamenti, «Kazgıdromet» RMK fılıaly, oblystyq bilim, qurylys, sáýlet-qurylys, qarjy basqarmalarynyń basshylary men selektorlyq baǵytta aýdan ákimderi qazirgi ahýal týraly baıandady.
«Qazir óńirde jeldiń ekpini kúsheıip tur. Turǵyndardyń qaýipsizdigine basa mán berý kerek. Balalardyń qaýipsizdigi úshin mektep oqýshylary qashyqtan oqytýǵa kóshirildi. Al, balabaqshalar tárbıelenýshilerdi ýaqytsha qabyldamaıdy. Jaýapty salalar ásirese, ómirlik mańyzy bar nysandardyń qaýipsizdigin kúsheıtip, saqtyq sharalaryn jandandyrýy kerek»,- dedi Qaırat Bekenov.
Oblys ákiminiń orynbasary tıisti sala basshylaryna birqatar tapsyrma júktedi.
Onyń aıtýynsha, búlingen ǵımarattar anyqtalyp, qalpyna keltirý jumystary qolǵa alynady. Maqat aýdanyndaǵy eki mekteptiń shatyry jóndelip jatyr.
Eske sala ketelik, buǵan deıin Atyraýda qatty jel turǵyn úıler men mektepterdiń shatyryn ushyrǵanyn, shaharda shańdy daýyl soǵyp turǵanyn habarlap edik.
