Atyraýdaǵy shaǵyn aýdanda qubyrdan aqaý tabylyp, jylý berý ýaqytsha toqtatyldy
Atyraý qalalyq turǵyn úı-kommýnaldyq sharýashylyq bóliminiń sektor meńgerýshisi Temirlan Áýbákirovtiń málimetinshe, «Nursaıa» shaǵyn aýdanynda kópqabatty birneshe úıge jylý berý toqtatylǵan.
«Búgin, 26 jeltoqsanda atalǵan shaǵyn aýdanda jalpy uzyndyǵy 3045 metrdi quraıtyn, dıametri 426 mm magıstraldi jylý qubyrynan aqaý tabyldy. Sol sebepten, jergilikti ýaqytpen saǵat 11:30-da jylý berý ýaqytsha toqtatyldy. Bul qubyr kópqabatty 87 turǵyn úı men №40 orta mektepti jylýmen qamtıdy. Naqtylaı aıtsaq, qazir jylý berý №1-27, №55-70, №80-11, №112-121 jáne Narynbaev kóshesinde ornalasqan №17, 15, Mádenov kóshesindegi 14a mekenjaıyndaǵy úıler jylýsyz otyr», -dep habarlady Temirlan Áýbákirov.
Onyń aıtýynsha, atalǵan jylý qubyryna jóndeý jumystaryn «Atyraý Jylý Júıeleri» AQ-nyń mamandary júrgizip jatyr. Atalǵan kásiporynnyń birinishi vıtse-prezıdenti-bas ınjener Álibek Temirǵalıevtiń deregine qaraǵanda, jóndeý jumysyna 15 qyzmetker men 5 tehnıka tartylǵan. Jóndeý jumystary aıaqtalǵasyn turǵyn úılerge jylý berý qaıtadan iske qosylatyn bolady.
Eske sala ketelik, budan buryn Atyraýda 9 kópqabatty turǵyn úı birneshe saǵat jylýsyz qalǵanyn habarlaǵan bolatynbyz.
Jylýdyń toqtatylýyna «Nursaıa» shaǵyn aýdanynda jylý qazandyǵynyń isten shyqqany sebep bolǵan. Turǵyn úılerge kommýnaldyq qyzmet kórsetý mekemesiniń basshylyǵy jylý berý úshin dıagnostıka júrgizbegeni anyqtalǵan.
