Atyraýdaǵy «Saraıshyq» sapar ortalyǵynda Qasym hannyń beınesi alǵash ret kórsetiledi
Atyraý oblystyq qurylys basqarmasynyń basshysy Nurbergen Qusaıynovtyń aıtýynsha, bul jobany júzege asyrý byltyr bastalyp, jyl sońyna deıin aıaqtaý kózdelgen.
«Alaıda, oblys ákimdigi Qazaqstannyń ózge óńirlerindegi osyndaı nysandardan ózgeshe bolýy úshin sapar ortalyǵynyń syrtqy kelbetine ózgeris engizý jóninde usynys jasady. Sol sebepten, qurylys jumysynyń merzimi uzartyldy. Qazir sapar ortalyǵynyń qurylysy aıaqtaldy dep aıtýǵa bolady. Endi jańa nysannyń irgeles aýmaǵyn abattandyrý úshin tas tóseý, kóshet egý, syrtqy jaryqtandyrý, oryndyqtardy ornatý sekildi jumystar atqarylyp jatyr. Biz qurylys nysanyna qadaǵalaý júrgizip, aldymen sapasyna nazar aýdaryp otyrmyz. Merdigerge qurylys boıynsha eskertýler jasalyp, nátıjesinde qatelikter túzetildi», -dep habarlady Nurbergen Qusaıynov.
Onyń aıtýynsha, sapar ortalyǵynyń qurylysyna 780 mln teńge bólingen. Osy kezge qarjynyń 90%-y ıgerilgen. Endi 10% qarjy nysan tolyq tapsyrylǵannan keıin merdigerge aýdarylady.
Sapar ortalyǵyndaǵy mýzeı ekspozıtsııalaryn ornatý jumystaryn «Qazaq materıaldyq mádenıet ǵylymı-zertteý jáne jobalaý ınstıtýty» JShS júrgizedi. Seriktestiktiń damý jónindegi dırektory Rınat Kýtdýsovtyń aıtýynsha, «Saraıshyq» sapar ortalyǵy – Altyn Orda kezeńine arnalǵan elimizdegi biregeı nysan.
«Saraıshyq – Uly Jibek joly boıyndaǵy ortaǵasyrlyq qala. Sapar ortalyǵynda mońǵolǵa deıingi kezeń, mońǵol kezeńi, sondaı-aq, Noǵaı Ordasy men Qazaq handyǵy kezeńderine arnalǵan birneshe ekspozıtsııalyq aımaq bolady. Bul ekspozıtsııalarǵa birqatar qundy dúnıeler, onyń ishinde Saraıshyq qalashyǵynyń materıaldyq muralary, dál osy jerden ár kezeńde tabylǵan jádigerler, Altyn Orda týy nemese búginde keıbir elderdiń memlekettik eltańbalarynda bar qos basty búrkit belgisi qoıylady. Bul belgi Saraıshyqtan tabyldy. Qasym han men Batý hannyń beıneleri alǵash ret osynda kórsetiledi. Bul tulǵalardyń beınelerin jasaý úshin ǵallymdarmen birlesken jumys atqaryldy», -deıdi Rınat Kýtdýsov.
Onyń pikirine súıensek, ortalyqta ǵylymı negizde qaıta jasalǵan Saraıshyqtyń biregeı maketi usynylady. Altyn Orda kezeńindegi Saraıshyqtyń beınesin jasaýǵa ǵalymdar kómektesken.
«Barlyq ekspozıtsııanyń mýltımedııalyq nusqasy jasaldy. Bul sapar ortalyǵynyń qonaqtaryna qazaq, orys jáne aǵylshyn tilderinde aqparat alýǵa múmkindik beredi. Munda alty ekspozıtsııalyq zal men kórme pavılony bar», -dep málim etti Rınat Kýtdýsov.
Eske sala ketelik, buǵan deıin Atyraýdaǵy «Saraıshyq» mýzeı-qoryǵynda qonaqúıi bar vızıt-ortalyq salynyp jatqanyn jazǵan edik.
