Atyraýdaǵy «Saraıshyq» mýzeı-qoryǵynda qonaqúıi bar vızıt-ortalyq salynyp jatyr

ATYRAÝ. QazAqparat – Atyraý oblysynyń Mahambet aýdanyndaǵy «Saraıshyq» memlekettik tarıhı-mádenı mýzeı-qoryǵynyń aýmaǵynda sapar ortalyǵynyń qurylysy júrip jatyr. Bul týraly mýzeı-qoryq dırektory, tarıh ǵylymdarynyń doktory, professor Ábilseıit Muqtar aıtyp berdi, dep habarlaıdy QazAqparat tilshisi.

«Saraıshyq» mýzeı-qoryǵynyń aýmaǵynda salynyp jatqan sapar ortalyǵynyń basty maqsaty – ejelgi qalashyqtyń, sondaı-aq Altyn Ordanyń, Noǵaı Ordasynyń jáne Qazaq handyǵynyń tarıhymen tanysýǵa keletin týrıster úshin barynsha jaǵdaı jasaý. Saraıshyq Shyǵys pen Batysty baılanystyratyn Uly Jibek Jolynda ornalasqan XIII-XVI ǵasyrlardaǵy eń tanymal qalalardyń biri bolǵan. Bilimi, ǵylymy, qolóneri men saýdasy damyǵan. Jaıyq ózeniniń oń jaǵalaýyndaǵy ejelgi qala ıslam dininiń ortalyǵy retinde tanylǵan. Ulys ydyraǵannan keıin Saraıshyq Noǵaı (Mańǵyt) ordasynyń, sodan keıin Qazaq handyǵynyń astanasy boldy. Saraıshyqta Qazaq handyǵy bıleýshileriniń biri Qasym han altyn taǵyna otyrdy», - deıdi Ábilseıit Muqtar.

Ortaǵasyrlyq qalanyń óte baı tarıhy bar. Týrısterdi qala tarıhymen keńirek tanystyrý úshin sapar-ortalyǵynda alty ekspozıtsııalyq zal qarastyrylyp otyr. Ár zaldyń árqaısysynyń óz taqyryby, sonymen qatar kórme pavılony bar.

Qazir «Saraıshyq» mýzeı-qoryǵynyń qorynda 4,6 myńnan astam ejelgi jádiger saqtalǵan. Tarıhı qalashyqtyń aýmaǵynda da, onyń mańynda da ondaǵan shaqyrym radıýsta maýsymdyq arheologııalyq qazba jumystary júrgizilip keledi. Jyl saıyn mýzeı-qoryq qory jańa jádigerlermen tolyqtyrylady. Sondaı-aq Altyn Ordanyń tarıhyn zerdeleý jáne Saraıshyq qalashyǵynan Reseı Federatsııasynyń Astrahan oblysyndaǵy Saraı-Batý týrıstik ortalyǵyna deıingi jańa týrıstik marshrýtty ashý úshin zertteý jumystary qolǵa alynǵan.

«Jyl saıyn Saraıshyqqa týrıster kóp keledi. Sol týrısterge yńǵaıly bolý úshin sapar ortalyǵynda on bólmeli qonaqúı, sondaı-aq ashana ashý josparlanǵan. Al mýzeı-qoryq qyzmetkerleriniń ǵylymı jumystardy alańsyz júrgizýi úshin jeke kabınetter men zerthana ashylady. Qazir sapar ortalyǵynyń qurylysy aıaqtalýǵa jaqyn. Munda árleý men zaldardy bezendirý jumystary júrgizilip jatyr. Kóktemde sapar ortalyǵy alǵashqy týrısterdi qabyldaıtyny josparlanyp otyr», - deıdi Ábilseıit Muqtar.

Eske sala ketelik, Prezıdent tapsyrmasymen Atyraýda qurylysy toqtaǵan kontsert zalynyń ornyna mádenıet ortalyǵy salynatynyn jazǵan edik.

Foto: Óńirlik kommýnıkatsııalar qyzmeti