Atyraýdaǵy polıpropılen zaýytyna jospardan tys tekserý júrgiziledi
Atyraý oblystyq memlekettik eńbek ınspektsııasy basqarmasynyń málimetine súıensek, «Kazakhstan Petrochemical Industries Inc» (KPI) JShS zaýytynyń qyzmetkerlerinen kásiporynda jappaı qysqartýlar bolyp jatqany jaıly shaǵym túsken. Qyzmetkerlerdiń aıtýynsha, jumys berýshi qoldanystaǵy zańnamany buzyp, olardy aldaǵy ýaqytta jumystan bosatatyny týraly málimdegen.
«Memlkettik eńbek ınspektsııasy basqarmasyna «Kazakhstan Petrochemical Industries Inc» (KRІ) qyzmetkerlerinen aryz tústi. Sol aryzdyń negizinde eńbek ınspektsııasy tekserý taǵaıyndaıdy. 10 jumys kúni ishinde qarap, aryzdanýshylarǵa jetkizemiz. Ne sebepti qysqartý boldy, tıisti tólemder boldy ma, joq pa? Eńbek kodeksine sáıkes biz bárin tekserip, jaýabyn beremiz», - dedi Atyraý oblysy memlekettik eńbek ınspektsııa basqarmasynyń basshysy Igilik Áýbákirov.
Buǵan deıin áleýmettik jelide «KPI» JShS-da qyzmetkerlerdi jappaı jumystan bosatyp jatqany jazylǵan bolatyn.
Aıta keteıik, bul keshen qurylysyna 4300 adam jumysqa tartylǵan. Ol tolyq iske qosylǵanda 631 adam turaqty jumyspen qamtylady. «Teńiz» ken ornynda óndiriletin shıkizatty óńdeýge baǵyttalǵan kásiporyn jylyna 500 myń tonna polıpropılen shyǵara alady.