Atyraýdaǵy perınataldyq ortalyqtyń palatasyn tyshqan aralap júr
Bul vıdeo Atyraý oblystyk perınataldyq ortalyǵynda túsirilgen. Jas bosanǵan analardyń palatasynda tyshqan júr. Ortalyqtyń baspasóz qyzmeti kemirgishterdiń baryn joqqa shyǵarmady, tek olardyń dala tyshqandary ekenin aıtyp aqtaldy.
«Perzenthana Atyraý qalasynan alys jerde ornalasqan. Ǵımarat jazyq dalada bolǵandyqtan, dala tyshqandary bar. Alaıda, oblystyq perınataldyq ortalyqtyń ákimshiligi bul máseleniń aldyn alý úshin dezınfektsııa jumystaryn jıi júrgizedi. Soǵan qaramastan, tyshqandar ǵımarat ishinde paıda bolyp tur. Aldaǵy kúnderi dezınfektsııa jumystary taǵy da júrgiziledi», - dep habarlady perınataldyq ortalyqtyń baspasóz qyzmeti.
Atyraý oblystyq perınataldyq ortalyǵy byltyrǵy qazan aıynda koronavırýs ınfektsııasy taraǵan kezde salynǵan modýldik aýrýhanaǵa ýaqytsha kóshirilgen bolatyn. Al, modýldik aýrýhana Atyraý qalasynyń aýmaǵynan tysqary ornalasqan.
«Qazirgi ýaqytta oblystyq perınataldyq ortalyqtyń burynǵy ǵımaratyna kúrdeli jóndeý jumystary júrgizilip jatyr. Kúrdeli jóndeý jumystary aıaqtalǵan soń perınataldyq ortalyq burynǵy mekenjaıyna kóshiriledi. Jóndeý jumystaryn aıaqtaý, ortalyqty qaıta kóshirý merzimi qazan aıyna josparlanǵan», - dep málimdedi perınataldyq ortalyqtyń baspasóz qyzmetinen.
Eske sala ketelik, budan buryn atalǵan ortalyqtyń dárigerleri balany perzenthanadan shyǵararda shoý uıymdastyrǵan durys emesin aıtyp, usynys jasaǵanyn jazǵan edik.
«Árıne, náresteni úıge shyǵarý – zor qýanysh. Degenmen, ár nárseniń óz orny, shegi bolýy kerek. Perzenthananyń aldynda toı-dýman uıymdastyrmaı, náresteni shyǵaryp alýǵa 2-3 týysy, jaqyn adamdary kelse... Jyldyń tórt mezgilinde bolatyn ystyq pen sýyqtyń, jeldiń jaısyz áserinen ana men balany saqtap, úıine aman-esen jetkizip, qýanyshty óz shańyraǵynda toılasa, ıgi is bolar edi», - dep usynys jasaǵan edi dárigerler.
