Atyraýdaǵy perınataldyq ortalyqqa qatysty is áli tergelip jatyr

NUR-SULTAN. QazAqparat - Atyraýdaǵy sábı ólimi týraly atyshýly oqıǵanyń jańa faktileri anyqtaldy, dep habarlaıdy QazAqparat tilshisi.

Bul týraly QR Sybaılas jemqorlyqqa qarsy is-qımyl agenttigi Birinshi deparatmentiniń aǵa tergeýshisi Danııar Bekaıdarov aıtty.

«Atyraýdaǵy perınataldy ortalyqtyń basshylyǵy men qyzmetkerlerine qatysty qylmystyq is áli tergeýde jatyr. Qosymsha faktiler men epızodtar paıda boldy. Qazirgi ýaqytta biz oqıǵanyń qalaı bolǵanyn tolyqqandy materıal etip ázirlep jatyrmyz. Sybaılas jemqorlyq faktileriniń densaýlyq saqtaý salasyna qalaı áser etetini, ólim-jitim oqıǵalary týraly aıtylady. Kelesi aptada egjeı-tegjeıli baıandaımyz», - dedi D. Bekaıdarov agenttiktiń baspasóz ortalyǵynda ótken brıfıngte.

Eske salaıyq, Sybaılas jemqorlyqqa qarsy qyzmet jańa týǵan sábıdiń ólimine, sondaı-aq, jemqorlyq qylmystar boıynsha kúdikti Atyraý oblystyq perzenthanasynyń bas dárigerine qatysty istiń mán-jaıyn baıandady.

Atyraý oblysyna QR Densaýlyq saqtaý vıtse-mınıstri bastaǵan respýblıkalyq densaýlyq saqtaý uıymdarynyń mamandary keldi. Olar oblystyq perınataldyq ortalyqtyń dárigerlerine kómek kórsetedi.

Sondaı-aq, perınataldyq ortalyqtyń 31 qyzmetkeri jumystan ketý týraly ótinish jazǵany belgili boldy.