Atyraýdaǵy pandýstar talapqa saı emes
ATYRAÝ. QazAqparat - Atyraýdaǵy pandýstar talapqa saı emes ekeni anyqtaldy, dep habarlaıdy QazAqparat tilshisi.
«Nur Otan» partııasynyń baspasóz hatshysy Elmıra Tuńǵatarovanyń aıtýynsha, «Kedergisiz keleshek» partııalyq jobasy aıasynda Atyraý qalalyq fılıaly múmkindigi shekteýli jandarǵa qolaıly orta qalyptastyrý maqsatynda baqylaý tobyn quryp, monıtorıng júrgizdi. Tekserý barysynda qoǵamdyq oryndardyń múmkindigi shekteýli jandarǵa qolaılylyǵy qaraldy.
«Nur Otan» partııasy Atyraý qalalyq fılıaly ókilderi men qalalyq máslıhat depýtattary, qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý, sáýlet jáne qala qurylysy bóliminiń mamandarynan turatyn top Avangard yqsham aýdanyndaǵy №9 Qazposhta, Shaımardan Sarıev atyndaǵy sándik-qoldanbaly óner mýzeıinde jáne Atyraý oblystyq tarıhı - ólketaný mýzeıi ǵımarattarynyń beıimdiligin tekserdi.
Aıta ketý kerek, baqylaý tobymen birge І-shi top múgedegi Esbolat Balbaevta reıdke shyǵyp, áleýmettik nysandardyń múmkindigi shekteýli jandarǵa beıimdiligin qarady.
Tekserý barysynda №9 Qazposhta ǵımaratynyń múmkindigi shekteýli jandarǵa arnalǵan pandýsy bolǵanymen onyń tıisti talaptarǵa saı emestigi, múgedekterge arnalǵan kólik turaǵynyń belgisi qoıylmaǵany anyqtaldy. Kafel tóselgen pandýsqa jaýyn - shashyn, taıǵaq kezinde kóterilý qıyndyq týǵyzady. Syrtqy esikke qońyraý ornatylmaǵan. Zalda múgedekterge arnalǵan qyzmet kórsetý terezeleri joq.
Al Shaımardan Sarıev atyndaǵy sándik-qoldanbaly óner mýzeıinde múgedek jandarǵa arnalǵan kólik turaǵynyń belgisi bar. Qońyraý belgisi qoıylǵan. Іshke qaraı kirý kezinde arnaıy múmkindigi shekteýli jandar úshin nusqaý jolaqtary da kórsetilgen. Lıft ornatylǵan. Alaıda, lıftimen kóterilý kezinde tehnıkalyq aqaýlyqtar bary ekeni baıqaldy.
Baqylaý toby teksergen Atyraý oblystyq tarıhı-ólketaný mýzeıiniń pandýstary yńǵaıly. Degenmen, avtokólikten túskennen syrtqy esikke jetkenge deıin múgedekter úshin jaǵdaı jasaqtalmaǵan. Ǵımaratqa kirgen kezde belgi, jolaqtar kórsetilmegen jáne joǵary qabatqa kóteriletin lıft joq.
Aıta ketelik, arnaıy top áleýmettik nysandarda joǵarydaǵy atalǵan kedergiler boıynsha eskertýler berildi. Aldaǵy ýaqytta kemshilikterdi joıyp, múmkindigi shekteýli jandarǵa qolaıly orta qalyptastyrý úshin áli de jumystar atqarýy kerektigi aıtyldy.
