Atyraýdaǵy ortalyqta aı saıyn 100 erekshe bala ońaltýdan ótedi
«Zeıin Atyraý» erekshe balalardy damytý ortalyǵy úsh jyl buryn ashylǵan. Munda psıhıkalyq jáne sóıleý qabileti buzylǵan, aýtızm, tserebraldy sal aýrýy, Daýn sındromy bar balalar jan-jaqty ońaltýdan ótedi.
«Erekshe balalarǵa AVA-terapııa, neırogımnastıka, sensorlyq ıntegratsııa, beıimdelgen sport ádisteri arqyly keshendi ońaltý qoldanylady. Ortalyqta logoped, psıholog qyzmetteri kórsetiledi. Arnaıy mamandar balalardy sóıleýge, jazýǵa, qoǵamdyq ortada ózin-ózý ustaýǵa úıretedi. Munda aı saıyn 100-den astam erekshe bala ońaltýdan ótedi.
Úsh jyl ishinde ortalyqta ońaltýdan ótken 30-ǵa jýyq erekshe bala qatarlastarymen birge balabaqshaǵa barýǵa múmkindik aldy. Al, 15 bala mektep tabaldyryǵyn attady», - deıdi «Zeıin Atyraý» ortalyǵynyń jetekshisi Araı Baǵytjan.
Bıyl bul ortalyqta Tomatıs-terapııanyń zamanaýı ádistemesi engizilip, balalarmen sabaq ótkizýge arnalǵan sensorlyq buryshy jasalǵan. Erekshe balalar úshin basseın ornatylǵan. Bul – jobanyń quny 27 mıllıon teńge.
«Memleket erekshe balalardy ońaltý jobalaryna qoldaý bildirip otyr. Óıtkeni, sondaı balalardy ońaltý jumysyn tezirek jandandyrsaq, olar qatarlastarymen birge qalypty ómir súrýge beıimdeledi», -deıdi oblys ákiminiń orynbasary Jasulan Bısembıev.
Sondaı-aq, «Zeıin-Atyraý» erekshe balalardy damytý ortalyǵynda erekshe bilim berý qajettiligi bar 50 balaǵa 120 tegin kýrs uıymdastyrylǵan.
Eske sala ketelik, buǵan deıin bıyl 3 myńǵa jýyq atyraýlyq múgedek shıpajaıda tegin emdelgenin jazǵan edik.