Atyraýdaǵy ortalyq kópir qaıta ashylady

ATYRAÝ. QazAqparat – Atyraýda tireýi jyljyp ketýine baılanysty 10 qańtardan beri jabyq turǵan Ortalyq kópir qaıta ashylady, dep habarlaıdy QazAqparat.

«23 qańtar kúni jergilikti ýaqytpen saǵat 00:00-de Ortalyq kópirdegi kólik qozǵalysy qaıta jandanady. Qalanyń kommýnaldyq salasyna jaýapty qalalyq turǵyn úı-kommýnaldyq sharýashylyq bólimi men polıtsııa departamenti jol qozǵalysynyń qaýipsizdigin baqylaýda ustaıdy», - dep málim etti Atyraý qalasy ákiminiń orynbasary Rınat Janglıshev.

Ortalyq kópirdi tekserip shyqqan mamandardyń qorytyndysyna sensek, kópir ashylǵanǵa deıin 3.4, 3.11, 3.24 belgilerin ornatý kerek, sondaı-aq, kópirde keptelis týyndaýyna jol bermeı, júk kóliginiń júrýine tyıym salý qajet. Odan bólek, mamandar kópirdegi jyldamdyqty saǵatyna 40 shaqyrymnan asyrmaý qajettigin aıtqan. Jolaýshy tasymaldaıtyn qoǵamdyq kólik burynǵydaı óz baǵdary boıynsha júre beredi.

Eske sala keteıik, 10 qańtarda Atyraýdaǵy Ortalyq kópirde kólik qozǵalysyna tyıym salynyp, jabylǵan bolatyn. Tekserý barysynda ortalyq kópir arqyly ótetin dıametri 426 mm jylý jelileri tireginiń qozǵalǵany anyqtaldy.

Atyraýdyń ortalyq kópiri 1965 jyly salynǵan. Kúrdeli jóndeýden sońǵy ret 20 jyl buryn ótken. 2016 jyly júrgizilgen tehnıkalyq tekserý kópirdiń tireýishteri eskirip, jóndeýge muqtaj ekenin anyqtaǵan bolatyn. Búginde jóndeý jumystarynyń jobalyq-smetalyq qujattamasy jasalyp, memlekettik saraptamaǵa jiberilgen.