Atyraýdaǵy mýzeı ejelgi kúmis zergerlik buıymdardyń qupııasyn ashty
ATYRAÝ. QazAqparat - Atyraý tarıhı-ólketaný mýzeıinde kúmisten jasalǵan kóne zergerlik buıymdar kórmesi ashyldy. Ol jerde ulttyq mádenıetimizdiń qazynasyna engen ótken ǵasyrdaǵy sheberlerdiń úzdik jumystary usynylǵan, dep habarlaıdy «QazAqparat» HAA tilshisi.
«Bul kórmede ártúrli júzikter, bilezikter men boıtumarlar, belbeýler men qorymyzdaǵy júzikterdi usyndyq. Bul jaı ǵana kúmis buıymdar emes, ótken ǵasyrdaǵy qazaq zergerlik mádenıetiniń týyndysy sanalady. Qazaq halqy úshin kúmisten jasalǵan zergerlik buıymdar jaı áshekeı emes. Ár zattyń óz maǵynasy bolǵan, onymen birge qandaı da bir tarıh, oqıǵa, adamdardyń senetin yrymy baılanysty bolǵan», - dedi Atyraý tarıhı-ólketaný mýzeıiniń dırektory Rashıda Harıpova.
«Mysaly, qustumsyq júzik baqyttyń, jańa ómirdiń belgisi sanalǵan. Sondaı-aq, ol hat rólin oınaǵan. Bul júzikti anasy uzatylyp bara jatqan qyzyna taqqan. Turmysqa shyqqan qyzdy onyń jasy úlken erkek kindik týystary - úlken aǵasy nemese aǵaıy bir jyldan keıin izdep baratyn bolǵan», - dep túsindirdi mýzeıdiń etnografııalyq bóliminiń meńgerýshisi Lázzat Salıhova.
«Olar qyzdyń úıinen syı-syıapatpen qaıtyp kele jatqanda, anasy taǵatsyzdana aq oramaldy kútip otyrǵan. Eger oramaldyń ishine túıilgen qusmuryn júzik qaıtyp kelse, qyzdyń kúıeýiniń úıine sińisip ketkenin bildirgen. Eger qyz júzikti qaıtyp bermese, demek onyń jaǵdaıynyń jaqsy bolmaǵany», - dedi ekskýrsııa jetekshisi Ǵalııa Nazarbekova.
Eki saýsaqqa arnalǵan qosarlanǵan júzik eki otbasynyń birigýin bildirgen. Ol «qudaǵı júzik» dep atalǵan.
Qazaq sheberleriniń zergerlik buıymdary álemniń kóptegen mýzeılerinde saqtaýly tur. Ermıtajda da kóptep kezdesedi. Ol negizinen - qazaq handarynyń orys patshalaryna bergen syılary. Kórme zalynda kúmis buıymdar jasalǵan qural-jabdyqtar erekshe oryn alyp tur. Ony mýzeıge Reseı Federatsııasy Astrahan oblysynyń aýmaǵyndaǵy Bókeı ordasynda turǵan zergerlerdiń biriniń urpaqtary bergen. 
