Atyraýdaǵy muz aıdyny saraıy jańa standartqa saı emes
Sport salasyndaǵy bul máseleler oblys ákiminiń orynbasary Marat Mýrzıev ótkizgen jıynda talqylandy. Onyń aıtýynsha, qysqy sport túrlerine qyzyǵýshylyq tanytatyndardyń qatary ósken.
«Óńirde shaıbaly hokkeı men mánerlep syrǵanaýǵa bet burǵandar kóbeıdi. Ásirese, mánerlep syrǵanaý, shaıbaly hokkeı men kerlıng sekildi túrimen aınalysatyndardyń sany artty. Endi parahokkeıge qyzyǵýshylyq tanytyp otyrǵandar bar. Alaıda, Atyraýda jalǵyz muz aıdyny saraıy bar. Bul sportshylarǵa tarlyq etip otyr. Onyń ústine qoldanystaǵy muz aıdyny jańa standarttarǵa sáıkes kelmeıdi. Sol sebepten, qosymsha muz aıdyny bar nysan qajet», -deıdi kerlıng federatsııasynyń prezıdenti Aıbar Esenǵalıev.
Oblystyq dene shynyqtyrý jáne sport basqarmasy basshysynyń mindetin atqarýshy Nurjaýǵan Tóleýovanyń aıtýynsha, jattyǵýǵa arnalǵan qosymsha muz aıdynyn salý úshin jer telimi qarastyrylǵan. Aldaǵy ýaqytta qurylys standarty bekitilgennen keıin jobalaý jumystary júrgiziledi.
Al, eskek esý sporty kenjelep qalǵan. Muny mamandar jattyqtyrýshylardyń jetispeýshiligimen baılanystyryp otyr.
«Atyraý oblysynda 2027 jyldarǵa arnalǵan keshendi josparlar men memlekettik baǵdarlamalar aıasynda 26 jańa sport keshenin salý josparlanǵan. Qazir 31 balalar men jasóspirimder sport mektebi jumys isteıdi. Onyń ishinde Atyraý qalasynda 9, aýyldarda 22 sport mektebi bar. Ótken jyly 14 balalar men jasóspirimder sport mektebi derbes mekeme retinde sporttyq bazamen jabdyqtalyp, quryldy. Bul mektepterde 18 myń balalar men jasóspirimder sportpen tegin shuǵyldanady. Al, 370 jas sportshy olımpıadalyq rezervti daıarlaý ortalyǵynda daıyndalady. Munda oımpıadalyq sporttyń 11 túri bar», - dep málim etti Nurjaýǵan Tóleýova.
Qazaqstan ulttyq quramasyna 401 atyraýlyq sportshy alynǵan. Olardyń arasynda Parıj olımpıadasyna joldama alýdan úmitkerler bar.
Eske sala ketelik, buǵan deıin Atyraýlyq jas shahmatshy qyz álemniń úsh dúrkin chempıony atanǵanyn jazǵan edik.
