Atyraýdaǵy meıramhanalar karantın shekteýin birneshe ret buzǵan
ATYRAÝ. QazAqparat – Atyraý qalasyndaǵy meıramhanalardyń karantın shekteýin buzýy toqtalmaı tur, dep habarlaıdy QazAqparat.
Atyraý qalalyq polıtsııa basqarmasy bastyǵynyń birinshi orynbasary Erlan Bıǵambaevtyń málimetinshe, karantın shekteýin elemeı, jumys istegen birneshe meıramhana anyqtalǵan.
«Máselen, 26 jeltoqsanda túngi saǵat 22:30 shamasynda «Tofý» meıramhanasy 60-qa jýyq adamǵa qyzmet kórsetkeni belgili boldy. Bul meıramhana buǵan deıin karantın rejımin eki ret buzǵan. Al, 26 jeltoqsanda túngi saǵat 23:40 shamasynda І.Jansúgirov kóshesindegi «Ak's rezerve» meıramhanasynda 20-ǵa jýyq adam bolǵany anyqtaldy. Atalǵan meıramhana da budan buryn eki ret karantın rejımin buzdy», - deıdi Erlan Bıǵambaev.
Onyń aıtýynsha, «Jansezim», «Gúlsezim» azyq-túlik dúkeni shekteýli ýaqyttan keıin de jumys istegen. Al, «Loto» oıyn klýbynyń tyıym salynǵanyna qaramastan jumys istep turǵany anyqtalǵan.
Eske sala ketelik, budan buryn Atyraý oblysynda kópshilik sharalardy ótkizýge tyıym salynǵanyn jazǵan edik.
