Atyraýdaǵy mektepterde 20 STEM-zerthana ashylady
Keńes otyrysyna Atyraý oblysy ákiminiń birinshi orynbasary Serik Shapkenov, jas depýtattar, keńes músheleri, joǵary jáne arnaýly oqý oryndarynyń basshylary, jastar isi jónindegi komıtet jetekshileri men jastar resýrstyq ortalyqtary basshylary qatysty.
«Jastar jylyna oraı jasalǵan kómektiń biri – tegin bilim granttarynyń kóbeıýi. Bıyl elimizde mektep bitirgen árbir ekinshi túlek joǵary oqý ornyna grantpen oqýǵa tústi. Bul oraıda, 232 atyraýlyq túlek oblys ákimi Nurlan Noǵaevtyń bilim berý grantyna ıe boldy. Jastardy baspanamen qamtý jumystary da óz kezegimen júrip jatyr. Barlyq atqarylyp jatyrǵan jumystar ári qaraı da jalǵasyn tabady», - dedi Serik Shapkenov.
Atyraý oblysynda 14-29 jas aralyǵyndaǵy jastar sanatyna kiretin 145 myńnan astam turǵyn bar. Bıyl óńir jastarynyń máselelerine baılanysty barlyq málimetter tereń zerdelenip, oblys jastarynyń damýyna jáne damytýǵa jaǵdaı jasaý maqsatynda Atyraý oblysy jastaryn qoldaýdyń 2019-2021 jyldarǵa arnalǵan Jol kartasy qabyldandy. 41 ındıkator men 67 is-sharany qamtıtyn Jol kartasy ár sanatttaǵy jastardyń kókeıkesti máselelerin sheshýge baǵyttalǵan.
Otyrys barysynda Atyraý oblystyq Jastar saıasaty basqarmasynyń basshysy Rollan Quspan atalǵan baǵdarlama aıasynda júzege asyrylǵan jobalar men basqa da atqarylǵan jumystarǵa toqtaldy.
«Búgingi tańda oblys mektepterinde STEM formatyndaǵy (ǵylymı, tehnıkalyq, ınjenerlik, matematıkalyq zerthana) 20 zerthana kabınetin ashý úshin oblystyq bıýdjetten qarajat bólinip, olardyń materıaldyq-tehnıkalyq bazasyn jabdyqtaý jumystary júrip jatyr. Oǵan qosa, oblys mektepteri janynan 57 robototehnıka kabıneti ashyldy. Birikken Ulttar Uıymynyń «Generation Unlimited» atty jaHandyq bastamasy aıasynda jastardyń oqýy men jumysqa turýy úshin qajetti ómirlik mańyzdy daǵdylar men mashyqtardy meńgerýine baǵyttalǵan «Samǵaý» jobasy júzege asyryldy. Bıyl oblystyń 6 aýdanynda «Jastar resýrstyq ortalyǵy» arnaıy ǵımaratpen qamtamasyz etildi», - dedi Rollan Quspan.
