Atyraýdaǵy mektepke akademık Salyq Zımanovtyń esimi beriledi

ATYRAÝ. QazAqparat – Atyraýdaǵy mektepke akademık Salyq Zımanovtyń esimi beriledi, dep habarlaıdy QazAqparat.

Bıyl belgili zańger, akademık Salyq Zımanulynyń týǵanyna 100 jyl toldy. Osyǵan oraı Atyraý oblystyq sotynyń tóraǵasy Baýyrjan Jumaǵulov óńir basshylyǵyna Atyraý qalasyndaǵy kóshe men mekteptiń birine ǵalymnyń esimin berý týraly usynys túsirgen edi.

«Jaqynda oblys máslıhatynyń depýtattary kezekti sessııada oblystyq sot tóraǵasynyń usynysyna qoldaý bildirdi. Atyraý qalasyndaǵy № 37 orta mektepke Salyq Zımanovtyń esimin berý týraly sheshim qabyldanyp, respýblıkalyq onomastıkalyq komıssııaǵa usynys jiberildi. Endi onyń esimin kóshege berý máselesi de óz sheshimin tabatyn bolady», - dep habarlady oblystyq sottyń baspasóz hatshysy Boranbaı Ǵalıev.