Atyraýdaǵy mektep-ınternat basshylyǵyna qatysty qyzmettik tergeý bastaldy
ATYRAÝ. QazAqparat - Tilinde aqaýy bar balalarǵa arnalǵan mektep-ınternatta buryn Atyraý oblystyq prokýrorlarynyń ustazdar tarapynan kush kórsetý faktileri anyqtalǵan edi. Osy oqıǵa boıynsha qyzmettik tergeý bastaldy, dep xabarlaıdy QazAqparat.
Atyraý oblysy ákiminiń birinshi orynbasary Serik Shapkenovtyń tapsyrmasymen mektep-ınternat basshylyǵynyń tarapynan balalarǵa zorlyq-zombylyq kórsetý jaǵdaıyna baılanysty tekserý júrgizetin komıssııa quryldy. Endi qajet bolǵan jaǵdaıda qylmystyq qýdalaý, onyń ishinde jumystan bosatý týraly sheshim qabyldanady.
«Qazir prokýratýra balalarǵa kush qoldanǵan tárbıeshilerge qatysty sotqa deıingi tergeý júrgizýde. Bul jabaıylyq jáne biz buǵan tosqaýyl qoıýymyz kerek. Aldymen mektep-ınternattardyń basshylyǵyn teksergen jón, bul óz qyzmetterine salǵyrt qaraý. Barlyǵyn tekserip, qatań jazalaý kerek»,- dep tapsyrdy Serik Shapkenov komıssııa jıynynda.
Sonymen qatar, oblys ákiminiń birinshi orynbasary múmkindigi shekteýli balalardy qadaǵalaıtyn jumyspen qamtýdy úılestirý jáne áleýmettik baǵdarmalar basqarmasy basshysynyń orynbasaryna «sógis» jarııalaýdy tapsyrdy.
«Komıssııa quramyna qoǵam belsendileri kiredi, osy komıssııaǵa kez kelgen mekemeni kez kelgen ýaqytta qadaǵalap, tekserý quqyǵy berilýi tıis. Erekshe balalardy oqytýdy jeke qadaǵalaǵan jón. Sondaı-aq, barlyq mektep-ınternat synyptarynda ǵalamtorǵa qosylyp, ata-analardyń, qoǵam belsendileri men tekserýshi organǵa baqylaýǵa múmkindik jasalady»,- deıdi Shapkenov.
