Atyraýdaǵy mamandandyrylǵan HQKO jyl sońyna deıin paıdalanýǵa berilmek
ATYRAÝ. QazAqparat - Atyraý oblysynyń ákimi Nurlan Noǵaev jańa nysannyń qurylys jumystarynyń barysymen tanysty, dep habarlaıdy QazAqparat tilshisi.
Aımaq basshysy oblys ortalyǵynda salynyp jatqan eki nysannyń - mamandandyrylǵan Halyqqa qyzmet kórsetý ortalyǵy men Oqýshylar saraıynyń qurylys barysyn tekserdi.
Mamandandyrylǵan HQKO qurylysy 90%-ǵa aıaqtaldy, jyl sońyna deıin paıdalanýǵa beriledi.
Jańa HQKO Atyraý-Astrahan tasjoly boıynan bólingen 4 ga jer ýchaskesine salynǵan. Munda avtokólik quraldaryn tirkeý, tirkeý týraly kýálik pen memlekettik nómir belgisin berý, jolda júrý erejeleri, avtokólik júrgizý boıynsha teorııalyq jáne tájirıbelik emtıhandar qabyldaý, júrgizýshilik kýálik daıyndaý jáne berý sharalary júzege asyrylady. Sonyń nátıjesinde eki saǵat ishinde avtokólikti tirkep, júrgizýshilik kýálik alýǵa múmkindik bolady.
«Mamandandyrylǵan HQKO ashylǵan kezde Nursaıa yqsham aýdanyndaǵy polıtsııa bólimshesiniń jumysy jeńildeıdi, tirkeý-emtıhan alý bólimi jańa nysanǵa kóshedi. Atalǵan polıtsııa bólimshesine kólik kóp baratyndyqtan, kólik keptelisi kóp bolatyn,- deıdi «Azamattarǵa arnalǵan úkimet» memlekettik korporatsııasy» kommertsııalyq emes AQ Atyraý oblysy boıynsha fılıaly departamentiniń basshysy Turlan Nurjanov.
Jańa ortalyqtyń syıymdylyǵy 800 adam, ǵımarat eki qabatty jáne jertóle qabaty bar. Sapaly qyzmet alýǵa barlyq múmkindik qarastyrylǵan - jeńil avtokólikterge arnalǵan 200 oryn, júk kólikterine arnalǵan 20 oryn bar. 20 oryn múmkindigi shekteýli adamdarǵa arnalǵan. Avtodrom, motodrom, avtokólikti tehnıkalyq baıqaýdan ótkizý ǵımaraty, eki baqylaý-ótkizý bólimshesi de bar.
Oblys ákimi barǵan ekinshi nysan - jastar men oqýshylar saraıy.
Nysan áýejaıǵa barar joldyń sol qaptalynda, Muz saraıynyń ońtústik-shyǵys betinde ornalasqan, aýmaǵy 3,5 ga.
Saraı ǵımaraty tórt qabatty, jertóle qabaty men tehnıkalyq ǵımarattan qurady.
Jańa jastar men oqýshylar saraıynda balalar men jasóspirimderdi damytýǵa barlyq jaǵdaı jasalady - mýzykalyq, sporttyq, kórme zaldary, oqý kabınetteri men zerthanalar bolady.
«Oqýshylar men jastar saraıy aımaqtaǵy óskeleń urpaqtyń jan-jaqty damýynyń naǵyz ortalyǵy bolady. Munda oblystyń barlyq aýdandarynyń balalary talanttaryn shyńdaı alady, Saraı tárbıelenýshileri óńirimizdi halyqaralyq mádenı, ǵylymı, sporttyq sharalarda laıyqty kórsetetinderine senemiz» - dedi Nurlan Noǵaev.
Jumys saparyn qorytyndylaǵan oblys ákimi qaramaǵyndaǵylarǵa barlyq júrip jatqan qurylys jumystaryn ýaqytynda jáne sapaly aıaqtaýdy tapsyrdy.
Osyǵan deıin Atyraý oblysynyń ákimi Nurlan Noǵaevtyń oblys ortalyǵyndaǵy birqatar kópqabatty úılerdiń qurylys barysymen tanysqandyǵyn jazdyq.
