Atyraýdaǵy qonaqúıde bolǵan órt: aýrýhanaǵa túskenderdiń jaı-kúıi belgili boldy
ATYRAÝ. QazAqparat - Atyraý oblystyq densaýlyq saqtaý basqarmasynyń ókilderi qaladaǵy qonaqúılerdiń birinde bolǵan órtten zardap shekkenderdiń jaı-kúıi qalaı ekenin aıtty, dep habarlaıdy QazAqparat tilshisi.
«Jedel medıtsınalyq járdem brıgadalary oblystyq aýrýhanaǵa 3 adamdy jetkizdi. Sonyń ekeýi Oraldan kelgen sportshy balalar, taǵy biri - 42 jastaǵy áıel. Olarǵa ys tıgen. Zardap shekkenderge qajetti kómek kórsetildi. Balalar aýrýhanadan shyǵaryldy. Áıeldiń jaǵdaıy turaqty, em-domyn alyp jatyr, ómirine tóngen qaýip joq», - dep málimdedi oblystyq densaýlyq saqtaý basqarmasynyń baspasóz qyzmeti.
Eske sala keteıik, keshe túnde Atyraýdaǵy qonaqúıdiń tómengi qabatynda monsha órtengen. Oqıǵa ornyna jetken qutqarýshylar 3 balany qutqaryp, 31 adamdy qaýipsiz aımaqqa kóshirdi, olardyń 29-y - bala. Qutqarylǵan jáne qaýipsiz aımaqqa kóshirilgen balalar Oral qalasynan jarysqa kelgen.
«Raıhan» qonaqúıinde órt shyqqany týraly biz onyń resepshndaǵy qyzmetkerlerinen bildik. Birer mınýttyń ishinde qara tútin qaptady. Qonaqúı qyzmetkeri joǵaryda balalar bar ekenin aıtty. Bizdiń dámhana da sol qabatta ornalasqan. Bizdiń jigitter - basqarýshy Alekseı Radygın, daıashy Maǵjan Jumaǵoja, barmen Bekbol Týtaev, aspaz Álibek Urmaǵambetov sol zamatta joǵary kóterildi. Olardyń artynsha balalardy qutqarýǵa daıashy Sabına Qasymova da attanǵan. Jigitterdiń aıtýynsha, Sabına, tipti, olardan da ozyp ketipti», - deıdi kýágerlerdiń biri, «Aıva» dámhanasynyń ákimshisi Jannat Dosjanova.
Avtor: A. Sokolov
