Atyraýdaǵy qonaqúı órtiniń egjeı-tegjeıi jarııalandy
ATYRAÝ. QazAqparat - Keshe túnde Atyraýdaǵy «Aq Jaıyq» qonaqúıiniń órtenýine qatysty tolyqqandy aqparat berildi, dep habarlaıdy QazAqparat tilshisi.
«21:50-de birinshi órt sóndirý bólimshesi jetkende «Aq Jaıyq» qonaqúıine japsarlas salynǵan The Guns & Roses Pub-Grille Atyrau meıramhanasynyń shatyry órtke oranǵan bolatyn. Qonaqúıdiń jalpy aýmaǵy men meıramhanany qamtyǵan jalyn shamamen 8 500 sharshy metrdi sharpyǵan. Jedel sharalar nátıjesinde 2:13-te órt aýyzdyqtalyp, 6:35-te tolyqtaı sóndirildi. Eshkim zardap shekpegen», - dep málimdedi Atyraý oblystyq TJD Órt sóndirý jáne apattyq-qutqarý jumystary qyzmetiniń bastyǵy Ábdiǵappar Jumanov.
Onyń aqparatyna sáıkes, órtti sóndirýge tótenshe jaǵdaılar departamentiniń 70 qyzmetkeri, 19 tehnıkasy, sondaı-aq «ATMA-Aeroport» AQ, AMÓZ «Órt sóndirýshi», «Semser», «Arnaıyavtobaza», «Atyraý Sý Arnasy» KMK qyzmetkerleri men tehnıkalary, 60 polıtsııa qyzmetkeri men olardyń 15 tehnıkasy, jedel medıtsınalyq járdem, «Atyraý Jaryq» AQ, sondaı-aq «QazTransGaz Aımaq» AQ qyzmetkerleri de qonaqúı órtin sóndirýge jáne zardaptaryn joıýǵa jumyldyrylǵan.
