Atyraýdaǵy kolledjge memleket qaıratkeriniń esimi berildi

ATYRAÝ. QazAqparat - Búgin Atyraý agrarly-tehnıkalyq kolledjine belgili memleket qaıratkeri Ońaıbaı Kóshekovtiń esimin berýge arnalǵan saltanatty shara ótti, dep habarlaıdy QazAqparat tilshisi.

Sharaǵa oblys ákimi Nurlan Noǵaev, Qazaqstan kásipodaqtary federatsııasynyń tóraǵasy Eraly Toǵjanov, eńbek ardagerleri men qoǵam ókilderi qatysty.

«Ońaıbaı Kóshekovtiń esimi elge belgili. Ol 15 jyldan astam ýaqyt oblysymyzdy basqardy. Ózge de jaýapty qyzmetterdi atqardy. Onyń tabandylyǵy, tájirıbesi men eńbekqorlyǵynyń arqasynda el úshin asa mańyzdy kóptegen ister júzege asty. Ol - esimi tarıh betterine altyn árippen jazylǵan birtýar tulǵa. Sondyqtan da jerlesteriniń shynaıy rızashylyǵy men yqylasyna bólendi»,- degen oblys basshysy Nurlan Noǵaev jastardy osyndaı tulǵalardy úlgi tutýǵa shaqyrdy.

Sonymen qatar, óńir basshysy atap ótkendeı, osy kolledjge atalmysh tulǵanyń esimin berý – óńirdegi kóptegen oqý oryndarynyń ashylýyna uıytqy bolǵan tulǵaǵa degen qurmet. Aımaq basshylyǵynyń sheshimimen Atyraý agrarly-tehnıkalyq kolledjine jańa ǵımarat salyp berý jóninde sheshim qabyldanǵan. Qazirgi tańda jobalaý-smetalyq qujattamalary jasaqtalyp jatyr.

Qazaqstan kásipodaqtary federatsııasynyń tóraǵasy Eraly Toǵjanov ta Ońaıbaı Kóshekovtiń týystaryn, kolledj ujymy men stýdentterdi quttyqtaı otyryp, qaıratkerdiń el aldyndaǵy eńbegin erekshe atap ótti. Bir kezderi ol Mańǵystaýdy da basqarǵan. Ońaıbaı Kóshekovtiń óńir basshylyǵy tusynda álemdegi iri qory bar Teńiz munaı kenishi ashyldy, Atyraý- Ganıýshkın tas joly salyndy, Inder-Saǵyz-Mııaly joly salyna bastady, Maqat-Inder temir joly iske qosylyp, aýyl sharýashylyǵy salasy keń kólemde damı bastady, ekonomıkanyń ózge de salalary órisin keńge jaıdy.

Eńbek ardageri Esen Tasqynbaev Ońaıbaı Kóshekovpen birge qyzmet atqarǵan kezderin saǵyna eske alyp, sol jyldar týraly tebirene syr shertti.

«Ońaıbaı Kóshekovtiń esimine qylaýdaı daq túsirmeıdi degen senimdemin. Ustazdar memleket paıdasy úshin eren eńbek úlgisin kórsetetin shákirtterdi tárbıeleıdi dep úmittenem»,-dedi óz sózinde Esen Tasqynbaev.

Saltanatty shara barysynda shaqyrylǵan qonaqtar Ońaıbaı Kóshekovke arnap qoıylǵan eskertkish-bıýstiń ashylýyna qatysyp, kolledjdiń búgingi tynys-tirshiligimen de tanysty.