Atyraýdaǵy ınfektsııalyq statsıonarda 102 júkti áıel emdelip jatyr
Bul týraly oblystyq máslıhatynyń kezekten tys VІ sessııasynda oblys ákimi Mahambet Dosmuhambetov málim etti.
Ákimniń aıtýynsha, óńirdegi epıdemııalyq ahýal kúrdelenip barady. Byltyrdan beri ahýaldy turaqtandyrý úshin 10 densaýlyq saqtaý nysany paıdalanýǵa berilgen. Jedel medıtsınalyq járdem avtoparki tolyq jańartylǵan. Sondaı-aq, 5 jyljymaly medıtsınalyq keshen jetkizilip, medıtsınalyq nysandarda 8 ottegi stantsııasy iske qosylǵan.
«Qazirgi sátte oblysta kúrdeli jaǵdaı qalyptasty. Atyraý koronavırýs ınfektsııasynyń tirkelýi dereginiń kóbeıýine baılanysty 26 maýsymnan bastap «qyzyl» aımaqqa endi. Mundaı ahýal «Delta» shtamynyń taralýy men turǵyndardyń karantındik sharalardy saqtamaýynan bolyp otyr. Statıstıkaǵa súıensek, aýrý kórsetkishi 8 esege ósken. Byltyr osy kezeńde orta eseppen 5 830 jaǵdaı tirkelse, bıylǵy kórsetkish 7 767-ge jetip otyr. Jaǵdaıdy turaqtandyrý maqsatynda bas memlekettik sanıtarııalyq dárigerdiń qaýlysymen karantındik sharalar qatań baqylaýǵa alyndy» -deıdi Mahambet Dosmuhambetov.
Óńirde «Ashyq»» jobasymen QR kod alýǵa 812 ótinish túsken. Qazir 781 kásipkerlik nysan atalǵan kodty alǵan.
«Keıbir aýrýhanalardy ınfektsııalyq statsıonarǵa aınaldyryp otyrmyz. Jalpy ınfektsııalyq statsıonarlardaǵy tósek-oryn sany 2927-ge jetti. Qazir statsıonarlardyń 48,6 paıyzynda 1420 naýqas emdelip jatyr. Onyń ishinde 102 júkti áıel, jas bosanǵan 4 ana men 18 jasqa deıingi 13 bala bar. Statsıonarlardaǵy naýqastar sany sońǵy 10 kúnde 24 paıyzǵa ósti. Al, 3 896 naýqas ambýlatorııalyq em qabyldaýda» -dedi Mahambet Dosmuhambetov.
Oblys ákiminiń málimetinshe jedel járdem jumysyn kúsheıtý maqsatynda qosymsha 7 jedel járdem brıgadasy men 4 dıspetcherlik beket iske qosylǵan.
Qaýipti vırýstyń taralýyn toqtatýdyń birden-bir joly – vaktsına alý. Bıylǵy 1 aqpannan beri 135 myńnan astap adam vaktsına saldyrdy. Alaıda, áli de koronavırýs ınfektsııasyn juqtyrý azaımaı otyr. Qaýipti indettiń taralýy kóbeıip, epıdemııalyq jaǵdaı ýshyqsa, azamattardyń qaýipsizdigin qamtamasyz etý úshin budan da qatań sharalar qabyldaımyz» -dedi Mahambet Dosmuhambetov.
Eske sala ketelik, budan buryn Atyraý statsıonarlarynyń jansaqtaý bólimindegi júkteme 70 paıyzdan asqanyn habarlaǵan bolatynbyz.
