Atyraýdaǵy hımııa zaýytynda tutanǵan órt sóndirildi
ATYRAÝ. QazAqparat - Atyraýdaǵy jumys istemeıtin hımııa zaýytynda tutanǵan órt tolyqtaı sóndirildi, dep habarlaıdy QazAqparat tilshisi.
Órt búgin kúndizgi 11 shamasynda tutanǵan bolatyn.
«50 myń tekshe metr suıyqtyq syıatyn rezervýar órtendi. Onda mazýttyń qaldyqtary bar edi. Rezervýardyń jylytqyshpen qaptalyp, oqshaýlaǵyshpen jabylǵany jalyndy tunshyqtyrýǵa kedergi jasady. Órtti sóndirýge 38 adam jáne 10 tehnıka jumyldyryldy», - dep málimdedi Atyraý oblystyq órt sóndirý qyzmetiniń bastyǵy Ábdilqapar Jumanov.
Aıta keteıik, bir kezderi polıpropılen shyǵarǵan kásiporynnyń jumysy qazir toqtap qalǵan. Biraq onyń aýmaǵynda birneshe munaı-hımııa zaýyty, ottegi óndiretin tseh bar. Hımııalyq kombınattyń aýmaǵy Atyraý JEO men zaýyttyń tikeleı mańynda ornalasqan.
Avtor: A. Sokolov
