Atyraýdaǵy halyqqa qyzmet kórsetý ortalyǵynda vaktsınalaý beketi ashyldy
ATYRAÝ. QazAqparat – Atyraý qalasyndaǵy eń iri HQKO-da vaktsınalaý beketi ashyldy, dep habarlaıdy QazAqparat.
Atyraý oblystyq Densaýlyq saqtaý basqarmasynyń baspasóz qyzmeti taratqan aqparatqa súıensek, munda Halyqqa qyzmet kórsetý ortalyǵynyń qyzmetkerleri de, kelýshiler de koronavırýqa qarsy ekpe alady. Atalǵan ortalyq «Nursaıa» shaǵyn aýdanynda ornalasqan.
«Azamattarǵa arnalǵan úkimet» memlekettik korporatsııasy» KeAQ Atyraý fılıalynda 800-ge jýyq adam jumys isteıdi. Onyń ishinde 100 qyzmetker vaktsına alýǵa óz erkimen kelisim berip, ekpe saldyra bastady. Vaktsına salýǵa №2 Atyraý qalalyq emhanasynan 1 dáriger men 2 medbıke tartylǵan», - deıdi fılıaldyń qoǵammen baılanys jónindegi menedjeri Bekjan Ahmetov.
Onyń aıtýynsha, HQKO-dan «Spýtnık V» vaktsınasynyń I komponentin «Nursaıa», «Bolashaq», «Tulpar» shaǵyn aýdandarynyń turǵyndary da alýyna múmkindik jasalyp otyr.
Eske sala ketelik, budan buryn Atyraý obylysynyń ákimdiginde vaktsınalaý beketi ashylǵanyn habarlaǵan bolatynbyz.
