Atyraýdaǵy halyq qalaýlylary da qaıyrymdylyqtan tys qalyp jatqan joq
ATYRAÝ. QazAqparat - El Táýelsizdiginiń 25 jyldyǵyna oraı «Djýmııan» meıramhanasynda oblystyq maslıhattyń depýtaty Gúlsına Baıkenovanyń uıymdastyrýymen «25 Paıdaly is» atty qaıyrymdylyq is-sharasy ótti.
Buǵan deıin de ıgilikti sharalardyń basy-qasynan tabylatyn ol osy joly Sabyr Qazybaev atyndaǵy jetim jáne ata-anasynyń qamqorlyǵynsyz qalǵan balalar úıi jáne múmkindigi shekteýli jandardyń «Sheksiz talanttar» bı mektebiniń qatysýshylaryna qýanysh syılady. Osy oraıda Gúlsına Garıfjanqyzy elimizde múmkindigi shekteýli adamdarǵa arnalǵan bı stýdııasyn alǵash ashqandardyń biri ekenin de aıta ketken jón.
- Táýelsizdik merekesi qarsańynda kishkentaı búldirshinderimizge arnap jaqsy kóńil-kúı syılaýdy josparladyq. Osy sábılerdiń eshqandaı tarshylyq kórmegenin qalaımyn. Olardy qoǵamdyq ómirge tartý, balalar úıiniń tárbıelenýshileri men túlekterin áleýmettik beıimdeý jáne olarǵa kómek kórsetý jumystaryna jurtshylyqty tartý - aldaǵy ýaqyttaǵy maqsatymyzdyń biri, - deıdi Gúlsına Baıkenova.
Ózderine degen sheksiz qurmetke rıza bolǵandardyń atynan Lıza Safronova depýtatqa aq tilegin arnap, alǵys bildirdi.
- Búgingi sharaǵa áıelder qaýymdastyǵy da atsalysýda. Qaıyrymdylyq - ol tek materıaldyq kómek emes, bul jan-jaqty qamqorlyq pen kirshiksiz mahabbat. Bir qýantarlyǵy - balalar úıinde tárbıelenýshiler qatary azaıyp keledi. Bireýleri ata-anasymen qaıta qaýyshýda, ekinshilerin meıirimdi jandar asyrap alýda. Biz múmkindiginshe balalar úılerine, mektep-ınternattarǵa kontserttik baǵdarlamalarmen, az-kem syılyqtarymyzben baryp turamyz. Olar úshin túrli baıqaýlar, qyzyqty oıyndar uıymdastyramyz. Bul ómirde sábıdiń rıza bolǵan júzinen, onyń kúlkisinen qymbat ne bar? - deıdi oblystyq isker áıelder qaýymdastyǵynyń tóraıymy Nurly Áıtıeva.
Shara barysynda Halel Dosmuhamedov atyndaǵy Atyraý memlekettik ýnıversıtetiniń stýdentteri tartymdy oıyndar uıymdastyrdy. Sabyr Qazybaev atyndaǵy balalar úıiniń tárbıelenýshisi Súleıman Fomın án shyrqap, «Sheksiz talanttar» bı mektebiniń ónerpazdary myń burala bıledi. Sońynan oblystyq isker áıelder qaýymdastyǵy jáne saıasatker áıelder klýby atynan syılyqtar taratylyp, «Djýmııan» meıramhanasy tátti taǵamdarymen túski as usyndy.
Sondaı-aq Astana kúni qarsańynda Atyraý qalalyq máslıhatynyń depýtaty Qarshyǵa Jaýynbaev, qalalyq ardagerler keńesiniń tóraǵasy Álipqalı Bekesh pen «Nur Otan» partııasynyń músheleri eńbek jáne tyl ardageri Alevtına Morozovany mereıli jasymen quttyqtaýǵa arnaıy bardy.
Tyl jáne eńbek ardageri Alevtına Morozova eńbek jolyn 1943 jyly bastaǵan. Atyraý oblysynyń týmasy 47 jyl boıy «Atyraýmunaıgazgeologııa» AQ-da esepshi qyzmetin atqarǵan. Aqjaýlyqty ana bıyl 90 jasqa toldy. Alevtına ájeıdiń kózi nashar kóretindikten qarııanyń kútimin Belarýs elinen kelgen jıeni Irına óz moınyna alǵan. Onyń aıtýynsha, úıdegi tozyǵy jetken tońazytqyshty jańasyna aýystyrýǵa qarjy máselesi qolbaılaý bolǵan eken. Sol sebepti olar qalalyq ardagerler keńesinen kómek suraǵan. Endi, mine, halyq qalaýlylary mereke kúni zeınetkerdiń suranysyn qanaǵattandyryp, ony zor qýanyshqa keneltti. Qart áje ózin quttyqtap kelgen azamattarǵa zor alǵysyn arnady.
